На Алясцы афіцыянтка выгнала з бара мядзведзя
14- 25.09.2013, 20:55
- 20,567
У сталіцы Аляскі, горадзе Джуна, супрацоўніца бара здолела выгнаць з установы заблукалага туды чорнага мядзведзя.
Інцыдэнт адбыўся некалькі дзён таму, і ў выніку яго ніхто не пацярпеў, піша Lenta.ru.
Паводле інфармацыі, мядзведзь пахаджаў каля будынку гатэля і бара ўвечары. Яго заўважылі мэнэджэры, а затым і афіцыянтка Арыэль Светлік-Макарці (на фота).
Як толькі мядзведзь ступіў у пакой і накіраваўся да бара, яна закрычала на яго: «Не, мядзведзь! Ідзі! Табе нельга тут знаходзіцца!». Да здзіўлення дзяўчыны, мядзведзь тут жа ўцёк, нічога не крануўшы ў бары.
Біёлаг Раян Скот заявіў, што супрацоўніца бара выявіла мужнасць і павяла сябе з мядзведзем правільна.
Спецыялісты адзначылі, што наогул у Джуна не часта фіксуюцца выпадкі, калі мядзведзі заходзяць у будынкі тых ці іншых арганізацый, аднак бывае, што яны прыходзяць у жылыя памяшканні.
Чорны мядзведзь, або барыбал, шырока распаўсюджаны ў Паўночнай Амерыцы. Чорныя мядзведзі драбнейшыя за сваіх бурых суродзічаў, маюць гладкую чорную поўсць і злёгку выцягнутыя вушы. Дарослая асобіна можа дасягаць максімальнага памеру ў два метры. Важаць барыбалы да 235 кілаграмаў.
Фота : асабістая старонка ў Facebook Арыэль Светлік-Макарці