Мінпрацы не ведае, ці будзе павышацца пенсія

Далейшае павышэнне пенсій будзе вызначацца магчымасцямі пенсійнай сістэмы ў аб'ёмах, якія не парушаюць яе стабільнасць.

Пра гэта паведамілі ў Міністэрстве працы і сацыяльнай абароны Беларусі, перадае БелТА.

Пенсіі атрымлівае больш за 27% насельніцтва краіны (больш за 2,6 млн. чалавек). Выдаткі на выплату пенсій складаюць каля 10% ВУП (звыш Br5 трлн. штомесяц).

Асноўнымі задачамі ў галіне пенсійнага забеспячэння з'яўляюцца падтрыманне ўзроўню матэрыяльнага забеспячэння непрацаздольных грамадзян і забеспячэнне стабільнай працы пенсійнай сістэмы, адзначылі ў міністэрстве.

Нагадаем, з 1 студзеня 2012 года ўстаноўленая дадатковая мера падтрымкі непрацуючых атрымальнікаў пенсій у органах па працы, занятасці і сацыяльнай абароне ва ўзросце больш за 75 гадоў у выглядзе штомесячнай мэтавай даплаты. У ліпені бягучага года пераразлічаныя працоўныя пенсіі. У лютым, траўні і жніўні павышаныя мінімальныя працоўныя і сацыяльныя пенсіі, надбаўкі, павышэнні і даплаты да пенсій у сувязі са змяненнем бюджэту пражытачнага мінімуму ў сярэднім на душу насельніцтва.

У сярэднім памер пенсіі па ўзросту з пачатку гэтага года павялічаны на 11%, у верасні ён складае каля Br2,2 млн. За студзень-жнівень 2013 года да адпаведнага перыяду 2012 года сярэдні памер пенсіі па ўзросце павялічыўся на 48,5%, а ў рэальным выражэнні - на 24%. Суадносіны гэтай пенсіі з сярэднім заробкам падтрымліваецца на ўзроўні 40%.