«Палатачнікі» спросцяць працу фальсіфікатарам

«Парламенцкія выбары» плануецца праводзіць у адзін тур.

Змяненні, у прыватнасці, прадугледжаныя праектам закона «Аб унясенні змяненняў і дапаўненняў у некаторыя законы Рэспублікі Беларусь па пытаннях правядзення выбараў і рэферэндумаў». Пра гэта паведаміў сёння журналістам старшыня пастаяннай камісіі «палаты прадстаўнікоў» па дзяржаўным будаўніцтве, мясцовым самакіраванні і рэгламенце Аляксандр Зазуля, перадае БелТА.

«Плануецца, што пасля прыняцця гэтага заканадаўчага акта, выбары будуць праводзіцца ў адзін тур. Адзіная ўмова - гэта ўдзел больш 50% выбаршчыкаў», - заявіў ён.

Аляксандр Зазуля не ўдакладніў, калі законапраект можа быць прыняты. Разгледзець дакумент у другім чытанні плануецца на маючай адбыцца восеньскай сесіі.

У першым чытанні законапраект плануецца разгледзець 2 кастрычніка на першым пасяджэнні трэцяй сесіі пятага склікання «палаты прадстаўнікоў». Аляксандр Зазуля адзначыў, што дакумент дастаткова прапрацаваны ў міжсесійны перыяд. Ён падкрэсліў, што меркаванне аб вакацыях паміж сесіямі памылковае - у гэты час дэпутаты працягваюць працаваць, у тым ліку з законапраектамі.

Пачынаючы з 1995 года ні адны выбары, ні адзін рэферэндум, якія праводзяцца ў Беларусі, не былі прызнаныя тымі арганізацыямі, якія ўпаўнаважаныя міжнароднай супольнасцю назіраць за выбарамі і даваць ім ацэнку. За гэты час падрыхтаваныя сотні дакладаў, маніторынгаў, аналітычных матэрыялаў, даследаванняў пра фальсіфікацыі выбараў у Беларусі. Апісаныя тысячы выпадкаў парушэнняў і фальсіфікацый. Міжнародныя назіральнікі да тонкасцяў знаёмыя з метадамі беларускага рэжыму па забеспячэнню патрэбных вынікаў на выбарах.

Выснова аб тым, што ў Беларусі выбараў няма, была зробленая даўно як апазіцыяй, так і міжнароднымі назіральнікамі. Пасля падзеяў 19 снежня 2010 года гэтая выснова стала больш жорсткай: пад выглядам выбараў у Беларусі здзяйсняецца злачынства супраць народа.