«Беларуськалій» купляе яшчэ адзін тэрмінал Клайпедскага порта

Беларусь плануе пашыраць сваю прысутнасць у Клайпедскім порце.

Пра гэта паведаміў амбасадар Беларусі ў Літве Уладзімір Дражын у Гродна, піша БелТА.

Амбасадар адзначыў, што адчувальны прырост інвестыцый звязаны з развіццём беларускай прысутнасці ў Клайпедскім марскім порце. Ён паведаміў, што ААТ «Беларуськалій» набыло трэць галоўнага тэрмінала, які займаецца адгрузкай калійных угнаенняў у трэція краіны. У цяперашні час прапрацоўваецца пытанне аб набыцці яшчэ аднаго тэрмінала. Гэта дасць магчымасць нарасціць аб'ём паслуг па перавалцы грузаў, выйсці на новыя аб'ёмы грузаабароту.

Па словах Уладзімір Дражына, у мінулым годзе ў Клайпедзе перавалена 13,5 млн. т беларускіх грузаў. «Калі захаваецца такая ж дынаміка, за год-два мы выйдзем на 15 млн. тон, а гэта дасць магчымасць давесці аб'ём узаемных паслуг дзвюх краін да 1 млрд. даляраў. У мінулым годзе ён склаў 640 млн. даляраў», - адзначыў ён.

Раней «Беларуськалій» набыў 30% галоўнага клайпедскага тэрмінала за $30 млн. Пра гэта паведаміў журналістам прэм'ер-міністр Беларусі Міхаіл Мясніковіч падчас свайго візіту ў Літву ў красавіку 2013 года.

Пасля куплі беларускі вытворца ўгнаенняў заявіў аб тым, што мае намер у два разы павялічыць аб'ёмы перавалкі грузаў у Клайпедскім порце. Пры гэтым цяпер, пасля канфлікту з «Уралкаліем» аб'ёмы продажаў «Беларуськалію» пачалі падаць.

Клайпедскі порт - незамярзальны порт у горадзе Клайпеда, на ўсходнім узбярэжжы Балтыйскага мора. Самы важны і буйны транспартны цэнтр Літоўскай Рэспублікі, у якім злучаюцца марскія і сухапутныя дарогі ў напрамках Усходу і Захаду. З'яўляецца самым паўночным портам Балтыйскага мора.

У Клайпедскім порце 16 грузавых тэрміналаў, якія ўмоўна падзеленыя на тэрміналы вадкіх грузаў, тэрміналы сыпкіх і навалачных грузаў і тэрміналы генеральных грузаў.