На «Граніце» працаваць няма каму, але прафсаюзніка не бяруць

Прафсаюзнага актывіста не прынялі на працу на прадпрыемства, нягледзячы на востры недахоп кадраў.

Пра гэта сайту charter97.org паведаміў былы экскаватаршчык «Граніту» Леанід Дубаносаў звольнены за актыўную дзейнасць у незалежным прафсаюзе.

«Я пайшоў на біржу працы, і там мне далі тры накіраванні на «Граніт» па трох спецыяльнасцях: экскаватаршчык, памочнік экскаватаршчыка і зваршчык. У мяне ёсць «скарыначкі» па ўсіх гэтых спецыяльнасцях. Я прыйшоў на прадпрыемства, але мяне не пусцілі ў аддзел кадраў, сказаўшы, што ўсе супрацоўнікі аддзела кадраў альбо занятыя, альбо з'ехалі. На прапускной мне не дазволілі прайсці, хоць у мяне ёсць афіцыйныя паперы, а прадпрыемства зрабіла афіцыйны запыт на біржу працы», - адзначыў прафсаюзны актывіст.

Ён дадаў, што, у рэшце рэшт, яму ўдалося патрапіць на прыём да начальніка аддзела кадраў.

«Але па ўсіх спецыяльнасцях мне напісалі адмову, так як вакансій нібыта няма. У мяне ёсць спіс вакансій, якія мне далі на біржы працы . Па стане на ўчорашні дзень на «Граніце» былі вакантнымі 38 месцаў па самых розных спецыяльнасцях ад слесара да намесніка генеральнага дырэктара. Каля ўваходу на прадпрыемства таксама вісіць аб'ява, што патрабуюцца газа-электразваршчыкі . Але, тым не менш, у аддзеле кадраў мне заявілі, што вакансій няма», - сказаў Леанід Дубаносаў.

Нагадаем, што ў канцы 2011-га года 600 рабочых прадпрыемства «Граніт», размешчанага ў Мікашэвічах, заявілі аб выхадзе з дзеючай на прадпрыемстве афіцыйнай прафсаюзнай арганізацыі і намеры стварыць альтэрнатыўную першасную структуру Беларускага незалежнага прафсаюза. Аднак зарэгістраваць незалежны прафсаюз не ўдавалася, паколькі для гэтага неабходна было атрымаць юрыдычны адрас, а адміністрацыя прадпрыемства адмаўляла ў прадастаўленні памяшкання і працягнула ціск на прыхільнікаў новай арганізацыі.

З моманту стварэння суполкі незалежнага прафсаюзу на РУП «Граніт» былі звольненыя самыя актыўныя сябры незалежнага прафсаюза - Леанід Дубаносаў, Алег Стахаевіч, Мікалай Карышаў і яго жонка Маргарыта, Генадзь Паўлоўскі, Віталь Пашэчка, Людміла і Анатоль Літвінко.