ЛУКОЙЛ супраць манаполіі Сечына на рынку Беларусі
5- 27.09.2013, 12:07
- 10,108
ЛУКОЙЛ лічыць немэтазгодным надзяляць «Раснафту» эксклюзіўнымі правамі паставак нафты ў Беларусь.
Пра гэта заявіў у інтэрв'ю тэлеканалу «Россия 24» кіраўнік найбуйнейшай расейскай прыватнай нафтавай кампаніі Вагіт Алекпераў.
«Лічу, што роўны доступ павінен захавацца. Ён даваў магчымасць мець баланс і дамаўляцца Беларусі з рознымі пастаўшчыкамі», - сказаў ён у кулуарах інвестыцыйнага форуму «Сочы-2013».
Варыянт надзялення «Раснафты» функцыяй эксклюзіўнага пастаўшчыка нафты ў Беларусь абмяркоўваецца сярод іншых на перамовах гэтай кампаніі з уладамі нашай краіны. Пра гэта раней паведаміла агенцтву «Прайм» крыніца ў беларускіх органах дзяржкіравання. Яна адзначала, што ёсць і іншыя працоўныя версіі, напрыклад, што «Раснафта» ў 2014 годзе будзе пастаўляць палову нафты, імпартаванай з Расеі, а астатнюю палову беларускія НПЗ будуць закупляць самастойна.
У траўні прэзідэнт «Раснафты» Ігар Сечын казаў, што яго кампанія цяпер пастаўляе як раз прыкладна палову нафты, якая перапрацоўваецца на беларускіх заводах.