Аляксандра Герасіменя: Грошай спартсменам хопіць толькі на абед

111 тысяч у дзень для падрыхтоўкі спартсменаў да Алімпіяды або чэмпіянату свету недастаткова.

Іх хопіць толькі на абед. Так пракаментавала нормы грашовых выдаткаў у суткі на харчаванне, зацверджаныя Міністэрствам спорту, чэмпіёнка свету па плаванні і двухразовы срэбны прызёр Алімпіяды ў Лондане Аляксандра Герасіменя, перадае «Інтэрфакс».

«Думаю, гэтых грошай хопіць толькі на абед. Ды і на яго можа не хапіць. Добра, што ёсць зарплата, з якой можна яшчэ што-небудзь купіць, - заявіла спартсменка. - Для дзяўчат, у прынцыпе, можа і хапіць. Але я ведаю, што хлопцы кожны дзень ездзяць у краму і купляюць ежу. Але гэта ў залежнасці ад таго, дзе праходзяць зборы. Калі арганізаваны шведскі стол, то яны могуць узяць не адну і не дзве порцыі».

Паводле яе слоў, сёння ў беларускім спорце мала ўвагі надаюць дыетолагам, якія, лічыць чэмпіёнка, павінны быць у кожнай камандзе.

«Прыязджаць і есць тое ж самае, што і ўсе людзі, якія адпачываюць або знаходзяцца на аздараўленні, - гэта трошкі не спартыўнае харчаванне. Павінна быць размежаванне, у тым ліку і паміж відамі спорту. Добрае харчаванне - гэта палова поспеху. Калі ты дрэнна сілкуешся - у цябе няма сіл эфектыўна трэніравацца», - адзначыла Аляксандра Герасіменя.

Што ж тычыцца сродкаў, што выдзяляюцца на фармакалогію (Br58,1 тыс. у суткі) і аднаўленне (Br48,9 тыс. у суткі), то спартсменка згаджаецца, што гэтай сумы хопіць. Праўда, з агаворкай, «улічваючы, што ў нас добрай, прасунутай фармакалогіі, на жаль, няма». Для нармальнай жа фармакалагічнай падтрымкі спартсменаў дадзеная сума, па словах спартсменкі, «нішто». Калі займацца фармакалогіяй не толькі для трэніровак, але і для аднаўленчага працэсу, то гэтых сум будзе відавочна недастаткова, падкрэсліла суразмоўца.

Нагадаем, Міністэрства спорту зацвердзіла нормы грашовых выдаткаў у суткі на харчаванне. Пры падрыхтоўцы да летніх і зімовых Алімпійскіх, Паралімпійскіх, Дэфлімпійскіх гульняў спартсменам у суткі будзе выдзяляцца да Br111,2 тыс., а ў час міжнародных спартыўных мерапрыемстваў па відах спорту, па якіх створаныя нацыянальныя каманды, - Br137 тыс.