Міхаіл Русы папрасіў дапамогі ў русалкі

Русалка паабяцала выканаць запаветнае жаданне віцэ-прэм'ера.

Міхаіл Русы сёння азнаёміўся са стылізаванымі падвор'ямі раёнаў Гомельскай вобласці, якія размясціліся на бульвары Металургаў у Жлобіне - сталіцы «Дажынак-2013», перадае БелТА.

Падчас знаёмства з падворкамі віцэ-прэм'ер атрымаў прапанову ад русалкі загадаць сваё самае запаветнае жаданне. Пасля правядзення чароўных абрадаў вадзяная госця свята паабяцала, што гэта жаданне абавязкова спраўдзіцца.

Журналісты пацікавіліся ў Міхаіла Русага, якім жа было гэта патаемнае жаданне. «Каб Бог стала жыў у Беларусі, - адказаў ён. - Ёсць павер'е, што Кірыла Тураўскі, паміраючы, сказаў: «Прыйдзе час, і я дам ведаць пра надыход шчаслівага часу на гэтай зямлі». Пачаў расці крыж у Тураве, магчыма, гэта і ёсць знак ад нашага вялікага земляка. Таму няхай гэтая божая ласка заўсёды будзе над Беларуссю», - сказаў Міхаіл Русы.

Рэспубліканскі фестываль-кірмаш «Дажынкі-2013» пачаўся сёння ў Жлобіне Гомельскай вобласці. На працягу двух дзён у горадзе беларускіх металургаў будзе праходзіць ушанаванне лепшых працаўнікоў аграпрамысловага комплексу рэспублікі.

Падчас фестываля таксама выберуць «Міс-Дажынкі».

Падрыхтоўка да мерапрыемства выклікала незадаволенасць жыхароў горада. Яны пратэставалі супраць вырубкі дрэў і патрабаванняў уладаў праводзіць рамонт жылля за свой кошт. Некаторыя скардзіліся, што дзіцячыя калыскі не вытрымліваюць выпрабаванняў разбуранымі дарогамі.

Жлобінцы таксама кажуць, што на Беларускім металургічным заводзе амаль удвая скарацілі зарплаты, а больш за тысячу работнікаў напісалі заявы аб звальненні.

Журналісты раней заўважылі ў розных канцах раённага цэнтра надпісы «Дожинки» - не повод беспределить». Яны выказалі здагадку, што іх аўтарамі сталі незадаволеныя гараджане.