Мінэканомікі адпускае кошты
60- 4.09.2013, 12:48
- 37,576
Дзяржава ў 2014 годзе адмовіцца ад рэгулявання коштаў на хлеб і яшчэ на некаторыя тавары.
Пра гэта заявіў міністр эканомікі рэспублікі Мікалай Снапкоў падчас прамой тэлефоннай лініі ў газеце «Рэспубліка».
«Калі вы заўважылі, то мы за апошнія тры гады паступова памяншаем колькасць рэгуляваных тавараў у спажывецкім кошыку. Думаю, што ў 2014 годзе яшчэ скароцім гэты пералік, і ў тым ліку, хутчэй за ўсё, з яго знікне хлебабулачная прадукцыя», - сказаў ён.
Мікалай Снапкоў таксама адзначыў, што «нядаўняе павышэнне коштаў на хлеб з'яўляецца планавым, паступовым, каб гэтыя найменні хлеба і хлебабулачных вырабаў, якія займаюць самы нізкі коштавы сегмент, паступова вывесці на ўзровень сабекошту». На ўсе астатнія хлебабулачныя вырабы кошты фармуюцца ў залежнасці ад попыту, на аснове сабекошту і рэнтабельнасці, падкрэсліў міністр.
Ён падкрэсліў, што павышэнне коштаў на хлеб ажыццяўлялася на працягу года ў адпаведнасці з ростам даходаў насельніцтва. Такім жа чынам, паводле яго слоў, павышаюцца кошты і на іншыя тавары.
«Хачу заўважыць, што і акцызы, і ўсе рашэнні, якія мы прымалі з нагоды рэгуляваных пазіцый па павышэнню коштаў, адпавядаюць нашай матрыцы. Мы па-ранейшаму пацвярджаем інфляцыю ў 2013 годзе ў раёне 12%», - падкрэсліў ён.