Аляксандр Юрэвіч сышоў з БАТЭ
8- 10.01.2014, 13:12
- 13,435
Вопытны абаронца БАТЭ Аляксандр Юрэвіч працягне кар'еру ў іншым клубе.
У яго скончыўся кантракт з барысаўчанамі, піша «Прессбол».
Ураджэнец Ліды перабраўся ў БАТЭ з львоўскіх «Карпат» у пачатку 2008 года - і з ходу стаў адной з тых цаглінак, з якіх прызначаны незадоўга да таго галоўным трэнерам Віктар Ганчарэнка пабудаваў падмурак каманды, якая на працягу пяці гадоў запар выступала ў групавых стадыях еўракубкаў. Значнасць Юрэвіча ва ўсіх дасягненнях «жоўта-сініх» несумнеўная. Ён ніколі не рваўся на авансцэну, магчыма, дзейнічаў някідка, але вельмі надзейна, падкупіўшы заўзятараў і спецыялістаў грунтоўнасцю, стабільнасцю, хвацкім разуменнем гульні. У дадатак Аляксандр славіўся ўніверсалізмам: з’яўляючыся ярка выяўленым леўшуном, шмат сезонаў у складзе БАТЭ якасна адпрацаваў на процілеглым флангу абароны. А пры неабходнасці займаў і пазіцыю апорніка, паведамляе афіцыйны сайт БАТЭ.
За шэсць гадоў у Барысаве Юрэвіч столькі ж разоў станавіўся чэмпіёнам краіны, уладальнікам Кубка і двойчы - Суперкубка Беларусі, прызнаваўся лепшым абаронцам нацыянальнага першынства (2010), менавіта тут уступіў у шэрагі Клуба Сяргея Алейнікава як футбаліст, які правёў 500 паядынкаў на вышэйшым узроўні. Усяго Аляксандр згуляў за БАТЭ 228 матчаў, у якіх забіў 2 галы (чэмпіянат - 142/1, Кубак - 26/0, Суперкубак - 3/0, Ліга чэмпіёнаў - 37/0, Ліга Еўропы - 20/1).