Папа Рымскі падтрымаў украінцаў
10- 12.01.2014, 17:32
- 10,522
Кіраўнік Каталіцкай царквы паабяцаў маліцца за ўкраінскі народ.
Пра гэта кіраўніку Украінскай Грэцка-каталіцкай царквы Святаславу паведаміў арцыбіскуп Томас Эдвард Галіксан, Апостальскі нунцый ва Украіне, паведамляе дэпартамент інфармацыі УКГЦ
У сваім лісце ад 10 студзеня 2014 года на імя кіраўніка УГКЦ прадстаўнік Апостальскага Пасаду ва Украіне, у прыватнасці, адзначыў, што, атрымаўшы вестку аб сітуацыі ва Украіне, Святы Айцец Францішак праз арцыбіскупа Пятра Параліна запэўніў ўкраінскі народ у сваёй малітоўнай падтрымцы.
«Папа Францішак запэўнівае аб сваіх малітвах за супакой і згоду для любага ўкраінскага народа», - гаворыцца ў лісце з Ватыкана.
Масавыя акцыі прыхільнікаў еўраінтэграцыі ў Кіеве ды іншых рэгіёнах суседняй краіны пачаліся 21 лістапада пасля абвяшчэння ўрадам аб прыпыненні падрыхтоўкі Пагаднення аб асацыяцыі з ЕЗ, якое планавалася аформіць на саміце «Усходняга партнёрства» ў Вільні. Улады краіны некалькі разоў спрабавалі спыніць іх сілавымі метадамі, зачысціўшы Майдан Незалежнасці ад намётаў і актывістаў апазіцыі. У прыватнасці, у ноч на 30 лістапада спецпадраздзяленне міліцыі «Беркут» ўжыла гвалт і разагнала студэнтаў, якія праводзяць акцыю пратэсту. Тым не менш, людзі застаюцца ў цэнтры Кіева, а акцыі доўжацца ўжо другі месяц.