Масавыя звальненні работнікаў дзіцячых садкоў у Гродна

Заробкі ў выхавальнікаў дзіцячых садкоў упалі да двух мільёнаў.

З новага года былыя ведамасныя дашкольныя ўстановы, якія належалі вытворчаму аб'яднанню «Азот», будуць утрымлівацца на сродкі гарадскога бюджэту. Работніцы гэтых дзіцячых садкоў пачалі пісаць заявы на звальненне, паведамляе «Радыё Свабода».

Былы выхавальнік садка №42 Вольга распавяла, што яны напісалі заявы практычна ўсім калектывам разам з загадчыцай, так як не хацелі страціць разліковыя выплаты, якія па звальненні ім выплаціў «Гродна Азот». З больш чым 50 чалавек, па яе словах, засталіся працаваць толькі сем.

- І добрую разліковую выплату атрымала. Разам з заробкам я атрымала 43 мільёна. Ды і сама стаўка ў мяне ў месяц складала 2 мільёна 800 тысяч, а з даплатамі, калі даводзілася працаваць у дзве змены, я мела каля 5 мільёнаў. А тут нам прапанавалі стаўку 2 мільёна, - кажа яна.

Яе калега па працы Святлана дадае:

- Людзі сыходзяць, таму што заробкі нізкія і не адпавядаюць такой працы. Не ведаю, хто прыйдзе туды, але раз яны не хацелі непакоіцца за нас, кваліфікаваных педагогаў, то што тут скажаш!

Трывогу адразу забілі бацькі дзяцей. Адна з мам распавядае, што яе дзіця, вярнуўшыся з садка дадому, папрасіла есць. Раней такога не бывала. Яна пачала высвятляць прычыну. Аказалася, што нават кухароў у садку не хапае:

- І штат выхавальнікаў не ўкамплектаваны. Дайшло да таго, што групы пачалі аб'ядноўваць, прычым дзяцей трох гадоў - з тымі, каму ўжо шэсць. Гэта ненармальна. Выхавальніца не павiнна займацца адразу некалькімі групамі.

Новая загадчыца Лілія Лукша кажа, што ўсе 11 груп у садку функцыянуюць і ў іх пакуль па адным выхавальніку, але, маўляў, кожны дзень набіраюць новых работнікаў, паўсюль даюцца аб'явы. Яшчэ яна дадала, што не вельмі разумее тых педагогаў, якія пакінулі дзяцей, не дачакаўшыся, пакуль на іх месцы прыйдуць новыя выхавальнікі:

- За кожнай групай былі замацаваныя выхавальнікі. Некаторыя з іх сышлі і нічога нават не сказалі бацькам, а дзеці ж да іх прывыклі. Разумееце, педагог - гэта прызванне. Яны павінны былі дачакацца, пакуль на іх месца прыйдзе новы чалавек.

Алена водзіць у гэты садок дачку і кажа, што не мае крыўды на выхавальнікаў, якія пасыходзілі, так як не хацелі губляць на заробках, не кажучы пра добрыя разліковыя. Яна дзівіцца, што ў гродзенскім гарано, дзе больш чым за два тыдні ведалі, што звальняецца амаль увесь калектыў, не прынялі належных мер:

- Ведалі ж пра гэта загадзя. Я лічу, што ўся адказнасць за сітуацыю ляжыць на аддзеле адукацыі гарвыканкама. Я, напрыклад, сабе таксама шукаю заўсёды лепшага, і калі б мне не хапала грошай, то не працавала б на голым энтузіязме. Ясна, што тут дзеці, але асуджаць выхавальнікаў, якія звольніліся, я не магу і не буду.

Фота: fedpress.ru