Газета Саўміна распавяла аб зарплаце даярак у $1000

Урадавая газета знайшла даярак з заробкам больш за 10 мільёнаў рублёў.

Яны, як піша «Рэспублiка», працуюць у адным з калгасаў Магілёўскай вобласці. Паводле інфармацыі выданні «дойка ў рэжыме відэа» дазволіла на траціну павялічыць надоі.

Сёння праца ўсяго МТК «Галовічы» сельгаспрадпрыемства «Трылесіна-Агра» Дрыбінскага раёна - як на далоні. Варта націснуць кнопку кампутара - і на экране з'яўляюцца панарамныя карціны цэха дойкі і іншых будынкаў комплексу. «Усяго мы ўсталявалі 6 камер, якія дазваляюць убачыць памяшканні з розных ракурсаў», - удакладніў дырэктар гаспадаркі Пётр Малінін.

І ў рэжыме рэальнага часу, і ў запісы можна з лёгкасцю прасачыць, хто з работнікаў як выконвае свае абавязкі. Гэта, вядома ж, дысцыплінуе. Хоць электронны кантралёр у першую чаргу закліканы назіраць за каровамі. Каб, адсачыўшы іх паводзіны на працягу сутак, у выніку выпрацаваць найбольш аптымальную праграму догляду за жывёламі. І атрымаць жаданы вынік - павысіць прадукцыйнасць дойнага статка.

«Ужо ў першыя дні заўважылі заканамернасць: пасля вячэрняй дойкі каровы, як правіла, засынаюць. Але калі ў кармушкі зноў пакласці камбікорм, яны паднімуцца і паядуць. А раніцай - дадуць больш малака», - кажа дырэктар сельгаспрадпрыемства.

Сёння комплекс «Галовічы» працуе ў двухзменным рэжыме. Каровам тут кожныя 3 гадзіны даюць канцэнтраты, не робячы пры гэтым выключэння на дзённы або начны час. У выніку літаральна за два з лішнім месяца надоі выраслі на траціну. «Так што можна сказаць: 34 мільёна рублёў уласных сродкаў, якія пайшлі на відэаабсталяванне, былі выдаткаваныя не дарма», - адзначыў Пётр Малінін.

Як сцвярджае ўрадавая газета, работнікі на анлайн-кантроль не ў крыўдзе. Больш за тое, самым працавітым і адказным ён дазваляе разлічваць на добрыя прэміяльныя - за якасць малака і правільны догляд за жывёламі. У цэлым зарплата ў аператараў машыннага даення пастаянна павялічваецца і ўжо перавысіла 10 мільёнаў рублёў.

Старшыня Дрыбінскага райвыканкама Алег Маслак, які разам з кіраўніцтвам сельгаспрадпрыемства таксама сочыць за працай МТК «Галовічы» ў рэжыме «рэаліці», першымі крокамі ў гэтым кірунку задаволены.

«Вядома, перш чым усталёўваць відэакамеры, трэба вызначыцца: з якой мэтай? «Трылесіна-Агра», разам з умацаваннем працоўнай дысцыпліны, выкарыстоўвала гэты праект для ўдасканалення тэхналогіі кармлення-паення, а таксама дойкі кароў, - канстатаваў Алег Рыгоравіч. - Нейкія недахопы, прабелы ў рабоце комплексу я магу ўбачыць, не выходзячы з кабінета, і адразу паўплываць на ход падзей, пагутарыць з дырэктарам або спецыялістамі. Для гэтага не трэба марнаваць час і бензін на паездку, што таксама сур'ёзны артыкул эканоміі».

Адзначым, што беларускія даяркі нярэдка скардзяцца на жабрацкую зарплату. У мінулым годзе з вёскі Селішча Чэрыкаўскага раёна на гарачую лінію газеты «Звязда» звярнулася са скаргай на нізкую зарплату жанчына - аператар машыннага даення, якая працуе ў СВК «Язерскі». Заяўніца сцвярджае, што за апошнія месяцы яе зарплата ў сярэднім складала па 1,3 млн рублёў. Работнікі не ведаюць расцэнак і не разумеюць, адкуль бяруцца канчатковыя лічбы налічанай заработнай платы.

Яшчэ ў 2006 годзе, падчас прэс-канферэнцыі для расейскіх журналістаў, Лукашэнка распавёў, што даяркі ў Беларусі атрымліваюць 600 даляраў.