Google выпрабоўвае «разумныя кантактныя лінзы»

Гэта сенсацыя ў сферы прафілактычнай медыцыны.

Кампанія Google абвясціла, што выпрабоўвае «разумныя кантактныя лінзы», якія змогуць вымяраць узровень глюкозы ў слязах.

Для гэтага выкарыстоўваецца бескантактны чып і мініятурны датчык, усталяваны паміж двума пластамі матэрыялу для лінзаў і які вымярае ўзровень глюкозы ў крыві, паведамляе BBC.

У фірме распавялі, што ў гэты момант там працуюць над увядзеннем у механізм сігнальных светадыёдаў. Яны будуць запальвацца, калі ўзровень глюкозы перавысіць пэўны парог. У Google таксама заўважылі, што для выкарыстання новай прылады ў штодзённым жыцці яшчэ трэба шмат чаго зрабіць.

«Гэтая тэхналогія пакуль знаходзіцца на ранняй стадыі распрацоўкі, але мы ўжо завяршылі шматлікія клінічныя выпрабаванні, з дапамогай якіх можна ўдасканаліць прататып. Мы спадзяемся, што ў будучыні гэта адкрыццё дапаможа дыябетыкам назіраць за ходам свайго захворвання», - напісана ў блогу кампаніі.

Сенсацыя ў прафілактычнай медыцыне

Многія сусветныя фірмы ў апошні час працуюць над пашырэннем сектара партатыўных тэхналогій. Мяркуецца, што ў бліжэйшыя гады менавіта ў гэтым сектары будзе назірацца значны рост.

Паводле розных ацэнак, у наступныя пяць гадоў сектар можа вырасці на 10-50 мільярдаў даляраў. Асаблівая ўвага надаецца ахове здароўя. Апошняе вынаходства Google - «разумныя кантактныя лінзы» - накіравана на заваёву сектара, у якім чакаецца ўзлёт пакупніцкага попыту на падобныя прылады.

Паводле прагнозаў Міжнароднай дыябетычнай федэрацыі, да 2035 года на дыябет будзе хварэць кожны дзясяты. Дыябетыкі павінны пастаянна рэгуляваць узровень глюкозы ў арганізме, бо яе нечаканае падвышэнне небяспечнае.

На гэты момант большасць хворых робяць для гэтага аналізы крыві. Кампанія Google паведаміла, што зараз праводзяцца выпрабаванні прататыпа лінзаў, здольных ажыццяўляць счытванне звестак раз у секунду.

«Гэта сенсацыя ў сферы прафілактычнай медыцыны, - падзяліўся з Бі-бі-сі Маной Менан, кіруючы дырэктар кансалтынгавай фірмы Frost and Sullivan. - Яна можа пацягнуць за сабой цэлы шэраг іншых новаўвядзенняў, накіраваных на мініяцюрызацыю тэхналогій. Гэтыя партатыўныя прылады дапамогуць людзям сачыць за станам арганізма».

У гэты момант Google сумесна з Упраўленнем у санітарным наглядзе за якасцю харчовых прадуктаў і медыкаментаў ЗША працуе над увядзеннем лінзаў у эксплуатацыю. У бліжэйшы час Google пачне пошук партнёраў, якія з'яўляюцца экспертамі ў галіне вываду падобных прадуктаў на рынак.

Для гэтага фірма плануе распрацоўку асаблівых праграм-дадаткаў для смартфонаў. Іх мэтай будзе перадача вынікаў вымярэння лінзаў іх носьбіту і ягонаму лекару.

Інавацыйны падыход

Менан пахваліў намер Google працаваць з іншымі партнёрамі яшчэ да камерцыйнай гатоўнасці прадукту: «Іх адкрыты інавацыйны падыход дапаможа паскорыць распрацоўку гэтага прадукту і хутчэй выведзе яго на спажывецкі рынак».

Іншыя фірмы таксама заняліся распрацоўкай партатыўных прылад, здольных назіраць за здароўем карыстальнікаў. У гэтым годзе на выставе электронікі ў Лас-Вегасе быў прадэманстраваны прататып сістэмы па маніторынгу сну дзіцяці «Разумнае немаўля».

Гэты сэнсарны механізм, размешчаны ў вопратцы, сочыць за рухамі, тэмпературай і месцазнаходжаннем дзіцяці. Выявіўшы праблему, адмысловы дадатак для смартфона падае сігнал трывогі.

Таксама нядаўна быў прадстаўлены шэраг мадэляў смарт-гадзіннікаў, якія будуць адсочваць паводзіны арганізма шляхам кантролю за такімі паказчыкамі, як частата сэрцабіцця і тэмпература цела карыстальніка.

У мінулым годзе японская фірма Sony падала заяўку на патэнт для «Смарт-парыка». Выкарыстоўваючы цэлы спектр датчыкаў, парык будзе вымяраць тэмпературу, пульс і ціск у чалавека, што будзе яго насіць.