Браніслаў Камароўскі: Украінскія ўлады на валасок ад санкцый

Увядзенне санкцый супраць украінскіх чыноўнікаў можа адбыцца ў любы момант, калі яны не спыняць эскалацыю канфлікту ў краіне.

Пра гэта заявіў журналістам польскі прэзідэнт Браніслаў Камароўскі, паведамляе яго прэс-служба.

"Украінская ўлада павінна адназначна разумець, што санкцыі вісяць на валаску, што гэта тое, што можа адбыцца ў любы момант, калі не будзе спыненая спіраль канфлікту", - заявіў Камароўскі. Паводле яго слоў, у Еўропе разумеюць, што "санкцыі гэта крайняя мера, якая часам больш дзейнічае, калі з'яўляецца пагрозай".

Камароўскі кажа, што гаворка ідзе не толькі пра пакаранне, але і пра спыненне спаўзання Украіны да аўтарытарных і недэмакратычных рашэнняў. Аднак ён перасцярог, што часам адбываецца так, што санкцыі не спыняюць, а наадварот паскараюць пераарыентацыю краін да аўтарытарызму.

"Прыкладам гэтага працэсу можа быць Беларусь", - растлумачыў прэзідэнт Польшчы.

Ён заявіў пра неабходнасць перайсці ва Украіне да рэальных перамоваў і зрабіць рэальныя крокі, напрыклад, па законах, якія справядліва лічаць антыдэмакратычнымі.

Польскі Сейм сёння прыняў пастанову, у якой заклікаў бакі канфлікту ва Украіне да палітычнага дыялогу і прадугледзеў персанальныя санкцыі ў выпадку далейшага прымянення сілы. Як паведамляе ў пятніцу ўкраінская служба Polskie Radio, такі праект папярэдне быў узгоднены з усімі палітычнымі сіламі польскага парламента.

У пастанове польскія дэпутаты выказалі салідарнасць з дэмакратычным грамадствам Украіны, у асаблівасці рэпрэсаванымі і пацярпелым у выніку сутыкненняў. Яны асудзілі той факт, што былі "падушаныя з ужываннем сілы свабоды і грамадзянскія правы, асабліва права на мірныя сходы і свабоду выказванняў".

Акрамя таго, Сейм адзначыў, што "гвалтоўныя і драматычныя падзеі з ужываннем сілы праваахоўнымі органамі прывялі да ахвяраў".

Польскія дэпутаты таксама лічаць, што галоўнай прычынай "рашучых пратэстаў" стала прыняцце 16 студзеня Вярхоўнай Радай і падпісаныя прэзідэнтам Віктарам Януковічам законаў, якія "радыкальным чынам абмяжоўваюць свабоду маніфэстацый, выказванняў і іншых палітычных і грамадзянскіх правоў грамадзян Украіны".