Украінская настаўніца: Агідна адчуваць сябе быдлам
61- 25.01.2014, 10:04
- 4,728
Настаўнікаў прымусова адпраўляюць на мітынгі за Віктара Януковіча.
Настаўніца малодшых класаў адной з Горлаўскіх школ Аліна Пячонкіна распавяла сайту Gorlovka.ua, што на суботні мітынг у падтрымку прэзідэнта Украіна Віктара Януковіча, які адбудзецца сёння а 12.00 на плошчы перад гарсаветам, бюджэтнікаў зганяюць сілай пад пагрозай звальнення.
«Я - настаўніца, таму кажу, што адбываецца на самай справе ў мяне на працы. І настаўнікі праўда не жадаюць туды ісці, яны не падтрымліваюць Еўрамайдан, але і прэзідэнта не паважаюць. І наогул агідна адчуваць сябе быдлам, якое прымусова гоняць на мітынг», - адзначыла Аліна.
Яна адкрыта заяўляе аб прымусовым фармаце мітынгу, бо «гэта самае меншае, што я магу сёння зрабіць як свядомая грамадзянка сваёй краіны» і «каб жыхары Горлаўкі не думалі, што мы сапраўды падтрымліваем гэты бандыцкі рэжым».
Нагадаем, у святле апошніх падзей у сталіцы Украіны - горадзе Кіеве, Данецкая абласная арганізацыя Партыі рэгіёнаў ініцыявала правядзенне ў гарадах і раёнах вобласці акцыі ў падтрымку прэзідэнта Украіны «Данбас за закон і парадак!».
Горлаўская гарадская арганізацыя Партыі рэгіёнаў запрасіла ўсіх горлаўцаў прыйсці і падтрымаць яе 25 студзеня, а 12.00, на плошчы Леніна.