Белстат: 10% беларусаў атрымліваюць менш за 200 даляраў
68- 25.01.2014, 15:53
- 5,022
Дзель работнікаў з заробкам ніжэй за 2 млн рублёў склала 9,6% ад усёй колькасці арганізацый, у якіх рабіліся даследаванні.
Пра гэта паведамілі БелаПАН у Нацыянальным статыстычным камітэце паводле вынікаў даследавання заработнай платы ў лістападзе мінулага года. Удзельная вага працаўнікоў з заробкам вышэй за 10 млн рублёў склала 5,7%.
На аснове даследаванняў былі вылічаныя медыянны заробак і дэцыльны каэфіцыент дыферэнцыяцыі.
Медыянны заробак - памер заработнай платы, які знаходзіцца ў цэнтры шэрагу размеркавання колькасці работнікаў па памерах налічанай заработнай платы і які дзеліць яе на дзве роўныя часткі - з заработнай платай ніжэй і вышэй медыяннай.
Разлік медыяннага заробку паказаў, што пры размеркаванні колькасці работнікаў па памерах налічанай заработнай платы ў Беларусі ў лістападзе 2013 палове работнікаў налічаная заработная плата вышэй 4 млн 411,2 тыс рублёў, палове - ніжэй гэтага значэння. Медыянны заробак апынуўся менш сярэдняй заработнай платы на 17,5%, або 937,5 тыс рублёў.
Дэцыльны каэфіцыент дыферэнцыяцыі паказвае, у колькі разоў мінімальны ўзровень заработнай платы 10% найбольш высокааплатных работнікаў перавышае максімальны ўзровень заработнай платы 10% найменш аплатных работнікаў.
У лістападзе 2013 мінімальны ўзровень заработнай платы ў Беларусі 10% найбольш высокааплатных работнікаў у 4,2 разы перавышаў максімальны ўзровень заработнай платы 10% найменш аплатных работнікаў. Гэты паказчык у разрэзе абласцей вагаўся нязначна - ад 3,8 разы ў Магілёўскай вобласці да 4,3 разы ў Віцебскай, Гомельскай і Гарадзенскай абласцях. Найбольшы памер перавышэння заработнай платы 10% высокааплатных работнікаў у параўнанні з 10% нізкааплатных работнікаў назіраўся ў сферы прадстаўлення камунальных, сацыяльных і персанальных паслуг (4,7 разоў), сельскай гаспадарцы, паляванні і лясной гаспадарцы (4,3 разоў), здабычы паліўна-энергетычных карысных выкапняў (4,3 разоў).