Рынат Ахметаў: Бізнэс не можа заставацца ў баку, калі гінуць людзі
35- 25.01.2014, 16:14
- 4,765
Найбуйнейшы алігарх Украіны заклікаў да мірнага развязання канфлікту ў краіне.
Пра гэта гаворыцца ў заяве, апублікаванай на сайце кампаніі СКМ, якая належыць Рынату Ахметаву.
«За апошні тыдзень у краіне ўзмацнілася грамадзянскае супрацьстаянне. Яно прывяло да чалавечых ахвяр.
Гэта абавязвае нас выказаць сваю пазіцыю. Чалавечае жыццё - гэта галоўная каштоўнасць.
Мы хочам выказаць словы глыбокага спачування родным і блізкім загінулых.
Бізнэс не можа заставацца ў баку, калі гінуць людзі, узнікае рэальная пагроза расколу краіны, палітычны крызіс можа выклікаць сістэмны эканамічны крызіс і ў выніку абавязковае зніжэнне ўзроўню жыцця. Пры ўзнікненні палітычнага крызісу можа быць толькі адно выйсце - мірнае. Любы сілавы варыянт, любое прымяненне зброі недапушчальнае. Пры такім сцэнары ва Украіне не будзе пераможцаў, будуць толькі ахвяры і прайграўшыя. Але самае галоўнае - сілавым шляхам выхад не знайсці.
Адзіны выхад - перайсці ад вулічнага супрацьстаяння і спробаў яго падаўлення да канструктыўных перамоваў і дасягненню выніку. Удзельнікі перамоваў павінны кіравацца інтарэсамі ўсёй краіны. Менавіта ўсёй краіны! І быць гатовымі да рэальнага супрацоўніцтва і пошуку кампрамісу», - гаворыцца ў заяве.
Нагадаем, пратэсты супраць зрыву падпісання Пагаднення аб Асацыяцыі з ЕЗ ва Украіне працягваюцца ўжо больш за два месяцы. 22 студзеня адбыліся найбольш сур'ёзныя закалоты паміж прыхільнікамі апазіцыі і сілавікамі. Пасля нядоўгага перамір'я, увечары 24 студзеня, закалоты ў цэнтры Кіева аднавіліся.