Кім Чэн Ын пакараў смерцю сям'ю свайго расстралянага дзядзькі
84- 26.01.2014, 8:45
- 4,736
У Паўночнай Карэі згодна з загадам Кім Чэн Ына знішчаная ўся сям'я пакаранага раней высокапастаўленага чыноўніка.
Другі чалавек у дзяржаве - Чан Сон Тхэк, які маладому лідару КНДР прыходзіўся дзядзькам, быў расстраляны 12 снежня ў прысутнасці іншых высокапастаўленых функцыянераў.
Цяпер паўднёвакарэйскаму агенцтву «Рэнхап» на ўмовах ананімнасці неназваныя крыніцы паведамілі, што старэйшая сястра Чан Сон Тхэка разам з мужам - паслом КНДР на Кубе, а таксама пляменнік, амбасадар у Малайзіі і ягоныя сыны былі адкліканы ў Пхеньян у снежні мінулага года і забітыя.
Паводле звестак агенцтва, смяротнага пакарання не пазбеглі нават малалетнія ўнукі. Некаторых чальцоў сям'і Чан Сон Тхэка, якія аказалі супраціў уладам, расстралялі прама перад домам на вачах у суседзяў, паведамляе тэлеканал «Расея 24».
Нагадаем, Чан Сон Тхэка абвінавацілі ў дзяржаўнай здрадзе, карупцыі і прыхільнасці да парнаграфіі. Акрамя яго самога, былі пакараныя і сямёра ягоных памочнікаў, якія непасрэдна выконвалі даручэнні Чан Сон Тхэка.
Ёсць звесткі, што функцыянера пакаралі смерцю не ў выніку барацьбы за ўладу, а праз рознагалоссі ў пытаннях размеркавання валютных даходаў. Нібыта ён паспрабаваў зняць з сакрэтных рахункаў Кім Чэн Ына мільярд даляраў.
Паўднёвакарэйскія СМІ паведамілі, што Чан Сон Тхэк не падпарадкаваўся патрабаванням кіраўніка КНДР. Ён умяшаўся ў працу некаторых партыйных структур, якія займаюцца продажам за мяжу вугалю. Афіцыйна ў Пхеньяне пасля гэтага паведамлялі, што на Чан Сон Тхэку ляжыць адказнасць за продаж вугалю па заніжаных коштах, праз што краіна апынулася ў стане запазычанасці.