Гродзенскі КДБ выявіў змову загадчыц дзіцячага садка
88- 30.01.2014, 12:24
- 7,282
Настаўнікі і лекары ў працоўны час падзараблялі мяшэчнікамі на мяжы.
Аб паспяховай аперацыі мясцовага ўпраўлення КДБ рапартуе газета «Гродзенская праўда».
Аказваецца, гродзенцы перасякалі мяжу ў працоўны час, хоць па дакументах нібыта працавалі на працоўным месцы.
Нестыкоўкі замежных паездак з табелямі ўліку працоўнага часу выявіла УКДБ па Гродзенскай вобласці. Галоўнае ўпраўленне ведамаснага кантролю аблвыканкама праверыла, ці абгрунтавана грамадзяне атрымлівалі заработную плату. "Як і меркавалася, аматарам павандраваць налічваліся грошы за фактычна неадпрацаваны час. А гэта значыць, нанесены матэрыяльны ўрон дзяржаве", - піша аблвыканкамаўская газета.
Сярод парушальнікаў працоўнай дысцыпліны - лекары, настаўнікі, работнікі дзіцячых садкоў і іх сваякі.
"За шэсць апошніх гадоў тры загадчыцы і тры намесніцы загадчыц гродзенскімі дзіцячымі садкамі ў агульнай колькасці больш за дзвесці разоў перасеклі мяжу. Ва ўсіх двухстах выпадках яны павінны былі знаходзіцца на працы і выконваць свае службовыя абавязкі. Іх адсутнасць на працоўным месцы ніяк не адбілася на іх зарплаце", - паведамляе газета са спасылкай на Галоўнае ўпраўленне ведамаснага кантролю аблвыканкама.
Пакараць парушальнікаў не атрымалася. Кіраўнікі прагульшчыкаў палічылі непатрэбным накладваць на іх дысцыплінарныя спагнанні. Службовыя асобы пагадзіліся з прэтэнзіямі і добраахвотна пакрылі ў бюджэт сродкі, неабгрунтавана выплачаныя ім у якасці заробку і іншых выплат. Дзве загадчыцы дзіцячымі садкамі звольніліся па ўласным жаданні.