Цётка Кім Чэн Ына знаходзіцца ў Польшчы
6- 30.01.2014, 17:39
- 3,540
Жонка расстралянага дзядзькі паўночнакарэйскага дыктатара Кім Чэн Ына знаходзіцца ў Польшчы.
Кім Ген Хі, цётка паўночнакарэйскага лідара Кім Чэн Ына, з'ехала ў Еўропу пасля пакарання ў Паўночнай Карэі свайго мужа - высокапастаўленага чыноўніка КНДР Чан Сон Тхэка, паведамляе ў чацвер японская газета «Іаміуры» са спасылкай на неназваныя крыніцы.
Паводле яе дадзеных, Кім Ген Хі знаходзілася ў Швейцарыі пасля пакарання смерцю свайго мужа ў снежні мінулага года.
Японская газета паведамляе, што, па яе інфармацыі, пазней цётка Кім Чэн Ына перабралася ў Польшчу, піша «Інтэрфакс».
Між тым Нацыянальнае агенцтва выведкі Паўднёвай Карэі не мае дадзеных аб знаходжанні Кім Ген Хі ў Еўропе.
Яна з'яўлялася на публіцы ў Пхеньяне падчас ваеннага парада з нагоды 65-й гадавіны заснавання паўночнакарэйскага рэжыму 9 верасня 2013 года. Кім Ген Хі таксама была заўважаная на наступны дзень на музычным прадстаўленні арміі КНДР са сваім пляменнікам Кім Чэн Ынам і яго жонкай.
У пачатку студзеня паўднёвакарэйскія СМІ паведамлялі, што цётка паўночнакарэйскага лідара знаходзіцца ў коме пасля перанесенай аперацыі на галаўным мозгу.
У канцы мінулага тыдня стала вядома, што ў Паўночнай Карэі па загадзе Кім Чэн Ына знішчаная ўся сям'я яго дзядзькі Чан Сон Тхэка.
Паводле інфармацыі крыніц паўднёвакарэйскага агенцтва «Рэнхап», старэйшая сястра Чан Сон Тхэка разам з мужам - амбасдарам КНДР на Кубе, а таксама пляменнік, амбасадар у Малайзіі, і яго сыны былі адкліканыя ў Пхеньян ў снежні мінулага года і забітыя.
Смяротнага пакарання не пазбеглі нават малалетнія ўнукі. Некаторых членаў сям'і Чан Сон Тхэка, якія аказалі супраціў уладам, нібыта расстралялі прама перад домам на вачах у суседзяў.
Фота: Jason Lee/Files/Reuters