Алімпійскія квіткі: для «лепшых» людзей і дорага

Чыноўнікі Ульянаўскай вобласці павінны «расштурхаць» па людзях 224 алімпійскіх квітка і знайсці грошы на адпраўку шчасліўцаў у Сочы.

Губернатар Ульянаўскай вобласці Сяргей Марозаў распарадзіўся выкупіць квіткі, прадастаўленыя рэгіёнц па квоце (у колькасці 224 штукі), а потым аддаць іх «лепшым людзям». Квіткі павінны былі атрымаць шараговыя жыхары вобласці, а не чыноўнікі, і гэта падкрэслівалася асабліва, перадае «Радыё Свабода».

Пачнем з таго, што само па сабе паняцце «квоты для рэгіёну» выклікае масу пытанняў. Квота - гэта па сутнасці льгота. Але квіткі на гульні можна купіць праз інтэрнэт, таму рэгіянальная квота ў 224 квітка, пра якую казаў губернатар, здавалася б, не мае сэнсу. Аднак жа хутка высветлілася, што гэта зусім не квота, а фактычна разнарадка на наведванне гульняў заўзятарамі, прычым ідэя падобнай квоты належыць федэральнаму ўраду.

«Мэта гэтага даручэння ўрада РФ - падтрымаць расейскія каманды на Алімпійскіх гульнях, - патлумачыла в.а. дырэктара абласнога дэпартамента фізкультуры і спорту Ала Нікіціна. - Мы з вамі разумеем, што ўсе краіны свету будуць накіроўваць сваіх прадстаўнікоў, каб падтрымліваць іх каманды. Каб як мага больш было расейскіх грамадзян сярод заўзятараў, каб як мага больш гледачоў прыехала на Алімпіяду з рэгіёнаў, былі вызначаныя квоты для суб'ектаў Федэрацыі. Таму 224 квітка для Ульянаўскай вобласці, хоць памры, але будуць прадастаўленыя. Нашы людзі паедуць і падтрымаюць расейскія каманды».

Выкупляць гэтыя «абавязковыя» квіткі вырашылі за кошт мясцовага бюджэту. Гэта ж прасцей, чым спрабаваць прадаць іх у індывідуальным парадку. Сайт ульянаўскага аддзялення «Адзінай Расеі» паспеў абвясціць, што ў самых годных людзей «ад станка і ад сахі» з'явілася ўнікальная магчымасць паехаць на зімовую Алімпіяду бясплатна, таму што ў дадатак да квіткоў усе выдаткі на праезд і пражыванне возьме на сябе ўрад рэгіёну. Пры гэтым прыблізную суму знаходжання на Алімпіядзе сярэдняга заўзятара сайт «Адзінай Расеі» ацаніў у 163 тысячы рублёў. «Механізм размеркавання квіткоў сярод простых грамадзян павінен быць абсалютна бесстароннім, празрыстым і без якіх-небудзь прывілеяў, - заявіў сакратар рэгіянальнага аддзялення «Адзінай Расеі» Віктар Корнеў. - А чыноўнікі і заможныя грамадзяне павінны ехаць на Алімпіяду за свой кошт».

Неўзабаве здарыўся канфуз. Высветлілася, што прафінансаваць абяцанне губернатара абласны бюджэт не можа. «А навошта ж вы тады патрэбныя, галубка? - паўшчуваў Сяргей Марозаў на апаратнай нарадзе міністра аховы здароўя і спорту Валянціну Караулаву. - Мы павінны адправіць самых лепшых, вырашыць усе арганізацыйныя пытанні, сумку даць у дарогу з харчаваннем, як у савецкі час, суправадзіць…»

У выніку квіткі ўсё ж такі прапанавалі выкупіць тым жа самім лепшым людзям «ад станка і ад сахі», але ўжо з дапамогай муніцыпалітэтаў, арганізацый альбо прыватных спонсараў. «У нас ёсць спіс людзей, якія адпраўляюцца на Гульні, ён увесь час папаўняецца, і да 7 лютага мы яго складзем. У гэтым спісе у тым ліку і простыя працаўнікі, і педагогі, і студэнты, - патлумачыла ў тэлефонным інтэрв'ю кіраўнік абласнога дэпартамента фізкультуры і спорту Ала Нікіціна. - Ёсць розныя варыянты, як дапамагчы людзям з'ехаць, напрыклад, суфінансаванне. Любая арганізацыя зможа купіць свайму супрацоўніку хоць бы квіток на спаборніцтвы».

У камітэце па маладзёжнай палітыцы і спорце мэрыі Ульянаўска паведамілі, што ў спісе заўзятараў, якія едуць на Алімпіяду ў дэлегацыі ад абласнога цэнтра, 14 чалавек, імі закуплена 56 квіткоў. Старшыня камітэта Ігар Арынахін сказаў, што гэта людзі са сферы фізкультуры і спорту, але прозвішчы іх называць не стаў. «Мы аказалі ім кансультацыйную падтрымку, дапамогу ў арганізацыі, афармленні квітка і пашпарта заўзятара, - сказаў Арынахін. - Бюджэтных грошай не ўкладвалі, фінансавую дапамогу аказалі партнёры, інвестары».

Чыноўнікі, паспрабаваўшы выканаць распараджэнне губернатара, акрамя фінансавых, сутыкнуліся яшчэ з шэрагам цяжкасцяў: апынулася, што авіяквіткоў да Сочы ўжо няма, хоць на цягніку з'ехаць пакуль можна. Няма сэнсу арганізоўваць і цэнтралізаваную адпраўку дэлегацыі, паколькі квіткі набытыя на розныя спаборніцтвы, якія пройдуць у розны час. Складана размясціць заўзятараў у алімпійскім Сочы. «Нам абяцалі, што месцы будуць не ў гасцініцах, а на параходах, якія прышвартаваліся каля берага, - там танней», - сказала ў дыялогу з губернатарам міністр Валянціна Караулава.

«Самы танны аднамесны нумар у гасцініцах каштуе дзевяць тысяч рублёў за суткі, а квіткоў на праезд наогул няма! - сказаў на той жа апаратнай нарадзе кіраўнік Барышскага раёна Сяргей Качаткоў. - Каб паехаў адзін чалавек, трэба каля 50-60 тысяч вылучыць, гэта мінімум. І гэтыя грошы трэба вылучаць цалкам, таму што не кожны можа знайсці сродкі».

У муніцыпальных бюджэтах такія траты не прадугледжаныя.

Ала Новікава аспрэчвае памер названай сумы. Яна сцвярджае: калі паехаць на два дні, каб паглядзець два спаборніцтвы не самага высокага рангу, то можна ўкласціся ў 20 тысяч. Але для сельскіх работнікаў і гэтая сума можа апынуцца непад'ёмнай: кошт квітка на адно прэстыжнае спаборніцтва ў Сочы супастаўны з месячнай зарплатай «лепшых людзей». Паколькі ў муніцыпалітэтаў няма грошай, каб камандзіраваць усіх годных на Алімпіяду, запоўніць рэгіянальную квоту прапануюць прадпрымальнікам.

Ульянаўскі блогер Дзмітрый Малых цытуе свайго заможнага знаёмага, які сказаў: «Ну ўзяў я квіткі, калі ад Сяргея Іванавіча /Марозава/ прасілі, а далей што рабіць? Ніводнага нумара ў добрым піцізорніку няма, дзе жыць незразумела, у выніку, пэўна, не паеду наогул». Як адзначыў іншы інтэрнэт-каментатар, «каб не траціцца на праезд і гасцініцу, вырашылі ўзяць пабольш «лепшых людзей» з бізнес-асяроддзя».

Ёсць і прыклады, калі прадпрыемства праспансіравала сваім работнікам паездку на Алімпіяду. Спроба такога спонсарства на свінакомплексе «Волжскі» ў Чардаклінскім раёне вобласці скончылася кур'ёзна. Там сапраўды хацелі заахвоціць лепшага работніка паездкай на Алімпіяду, для чаго напярэдадні абвясцілі конкурс са штотыднёвым падвядзеннем вынікаў. Як распавёў уладальнік фермы Вадзім Румынскі, па выніках года лепшым работнікам апынулася жанчына каля 50 гадоў: «Яна - не прасунутая падарожніца, далей Ульянаўска ніколі не ездзіла, трохі спалохалася паездкі, - сказаў прадпрымальнік. - Спыніліся на тым, што купілі ёй пуцёўку ў санаторый замест Алімпіяды».