Беларуская сурагатная маці: Мы даўно хацелі «асвяжыць» кватэру

Афіцыйную статыстыку аб тым, колькі замежнікаў складаюць з беларускамі дамовы аб сурагатным мацярынстве, ніхто не вядзе.

Тым не менш, факт застаецца фактам: за салідную суму нашы жанчыны пагаджаюцца вынасіць дзіцяці для пары з-за мяжы.

«Рэспубліка» разбіралася ў тым, якія ўмовы прыцягваюць замежнікаў у Беларусі і ці не выходзіць так, што, развіваючы гэты від медтурызму, мы выстаўляем нашых жанчын «на экспарт»?

На інтэрв'ю гэтая пара з Масквы пагаджалася неахвотна. Бо пра тое, што яны звярталіся да паслуг беларускай сурагатнай мамы, ніхто са сваякоў не ведае да гэтага часу. Хоць іх дзіцяці ўжо два гады.

- У нас была бязвыхадная сітуацыя: мы чакалі нашага сыночка 15 гадоў, - уздыхае Алена Ляўданская (імя і прозвішча змененыя). - Памятаю, калі з мужам ажаніліся, адразу дамовіліся, што хочам траіх дзяцей. Я сама са шматдзетнай сям'і і ніколі не разумела, як дзіця можа расці без брацікаў і сястрычак. Цэлы год актыўнага «планавання» прывёў да нулявога выніку. Мы запанікавалі. Сталі хадзіць па дактарах, піць нейкія таблеткі - не дапамагло. Адправіліся да бабак, лекараў, экстрасэнсаў - дарэмна. Зрабілі ЭКА: адзін раз, другі, трэці - безвынікова. Верыце, я білася галавой аб сценку... На вуліцу выходзіла, а бачыла толькі цяжарных жанчын і парачкі з калыскамі. А потым убачыла нейкі тэлесюжэт пра сурагатнае мацярынства, і ўнутры нешта пстрыкнула. Мы з мужам былі ўжо на мяжы разводу, але вырашылі паспрабаваць. Першапачаткова былі настроеныя шукаць сурмаму ў Беларусі. У вашай краіне генетычныя бацькі больш абароненыя: сурагатная мама не можа «перадумаць» і забраць дзіцятка сабе.

Дакладных лічбаў, колькі ж замежнікаў звяртаюцца да паслуг беларускіх сурагатных маці, ніхто не называе. У агенцтвах паведамляюць, што такую статыстыку не вядуць. А ў Першай Менскай гарадской дзяржаўнай натарыяльнай канторы (тут у асноўным рэгіструюцца дамовы на аказанне паслуг сурагатнага мацярынства) тлумачаць, што асобнай статыстыкі па замежных грамадзянах няма. Але ў цэлым за мінулы год яны аформілі 16 дамоваў, у 2012-м - 9.

У РНПЦ «Маці і дзіця» ўзгадалі толькі 8 прыкладаў падсадка эмбрыёнаў сурагатнай маме.

Яшчэ адна прычына цікавасці замежнікаў да «нашых» сурмам - прывабныя расцэнкі. Сярэдні ганарар сурагатнай маці ў Беларусі - $15 тыс. (плюс штомесячнае фінансавае «суправаджэнне» цяжарнай), у той час як у адной з папулярных расейскіх клінік - не менш як $20 тыс. плюс немалая сума за падбор сурагатнай маці. Хоць у нас кошты ў агенцтвах па падборы сурагатных маці таксама «куслівыя» - $4,5-6,5 тыс.

...Але хто з жанчын гатовы ўзяць на сябе такую адказнасць?

Газеце ўдалося пагутарыць з Ганнай Нямкоўскай (імя і прозвішча змененыя). Яна жыве ў невялікім беларускім мястэчку. Літаральна паўгода таму жанчына нарадзіла дзіця для пары з Санкт-Пецярбурга.

- Першапачаткова мяне цікавіў матэрыяльны бок пытання, - прызнаецца Ганна. - У мяне маленькая дачка, ёй пяць гадоў. Муж працуе ляснічым - зарплата не Бог ведае што... Мы хацелі кватэру «асвяжыць». А тут такія вялізныя грошы - $15 000 пры нараджэнні дзіцяці, выплаты ў памеры $500 штомесяц і $600 на адзенне. І ўсё роўна доўга «выспявала». Але потым вырашылася. Я нават пасябравала з бацькамі майго... гэта значыць іх дзіцяці. Яны вельмі забяспечаныя людзі. Кватэра, машына, загарадны дом, прыслуга. Але не ўсё так вясёлкава. Іх першае дзіця памерла ў тры месяцы. Яны разышліся. У кожнага былі свае адносіны... Ну, вы разумееце. А потым нечакана сышліся. І раптам выявілі ў сябе букет захворванняў. Лячыліся доўга, потым накшталт нават ЭКА рабілі. Але нешта не заладзілася...

Тэма сурагатнага мацярынства выклікае буру кантрасных меркаванняў. А тое, што беларускія мамы «працуюць» на замежных кліентаў, і зусім спараджае плёткі.