Супрацоўнікі «Берасцейскага піва»: Ратуйце прадпрыемства ад захопу

Берасцейскаму піўзаводу пагражаюць рэйдэры

Пра гэта распавялі супрацоўнікі прадпрыемства, піша onliner.by.

Сцісла змест іх лістоў зводзіцца да наступнага: «Берасцейскае піва» правяло дарагую мадэрнізацыю і з'яўляецца «заводам-цукеркай». Аднак праз бяздарнае кіраўніцтва і цяперашнія дзеянні партнёра ў продажы - кампаніі «Аазіс груп» - становішча стала катастрафічным. Работнікі падазраюць гандлёвага партнёра ў рэйдэрстве.

«Прадпрыемства паспяхова працавала больш за 30 гадоў, вырабляючы і прадаючы сваю прадукцыю, - распавядае супрацоўнік, які звярнуўся да нас. - Перажыло дзве мадэрнізацыі. Людзі жылі надзеяй, што пасля мадэрнізацыі падвысяць заробкі, а завод запрацуе на поўную магутнасць. Аднак у сярэдзіне 2012 года з'явіліся чуткі аб набыцці «Берасцейскага піва» кампаніяй «Аазіс груп». З гэтага моманту ўсё пайшло на спад».

«Аазіс груп» - беларуская «дачка» міжнароднай кампаніі з расейскімі каранямі Oasis Beverages, асноўнымі акцыянерамі якой з'яўляюцца Яўген Кашпер і Аляксандр Ліфшыц. У пачатку 90-х яны займаліся дыстрыбуцыяй імпартнага піва ў Расеі. Самы гучны іх праект там - «Піваварні Івана Таранава», у Беларусі - піўзавод «Сябар». І першы і другі праекты ў свой час былі прададзеныя Heineken, аднак цікавасці да рынку напояў бізнэсоўцы ад гэтага не згубілі. Сёння праекты Oasis Beverages запушчаны ў Расеі, Казахстане, Украіне і Беларусі. Тут «Аазіс груп» належыць сокавы завод «Старая крэпасць» (ТМ «Сочны») і невялікія аб'ёмы разліву на «Крыніцы» (піва Oettinger).

Дарэчы, у інтэрв'ю ў пачатку мінулага года Яўген Кашпер сказаў наступнае:

«У Беларусі ў апошні час працаваць няпроста. Наш бізнэс там даволі паспяховы, але ў мінулым годзе, калі адбылася дэвальвацыя мясцовай валюты ў 3 разы, мы шмат страцілі. Каб усур'ёз развівацца на гэтым рынку, трэба мець сваю вытворчасць. Мы мяркуем, што брэнды, якія мы ствараем у Расеі, валодаюць высокім патэнцыялам на ўсёй рускамоўнай прасторы, напрыклад «Жыгулі барнае» або «Хамоўнікі».

Выпадкова ці не, але ў пачатку 2013 года закрываецца прадстаўніцтва «Берасцейскага піва», а з чэрвеня, у пік сезону, усе продажы наўпрост згортваюцца і пачынаюць весціся праз пасярэдніка, кажа супрацоўнік завода:

«Па-мойму, кожны працаўнік, акрамя дырэктара, бачыў, што ўмовы продажу піва цалкам нявыгадныя. Піва рэзка падаражэла, месцы продажу губляліся, прадукт вяртаўся і ішоў на зліў. Год праўлення Валерыя Мацкевіча [дырэктара піўзавода ў мінулым годзе] паставіў прадпрыемства на калені і падзяліў супрацоўнікаў на два лагеры: сваіх і чужых».

У канцы мінулага года нечакана для работнікаў у крэсла кіраўніка вярнуўся ранейшы дырэктар - Алег Кісель. Вярнуўся пасля гадавой працы... ў «Аазіс груп».

«Вярнулі дырэктара нечакана, - распавядае супрацоўнік завода. - Рабочыя былі задаволеныя, але толькі таму, што гэта крыху лепшы варыянт. Кісель - выхадзец з завода, прайшоў шлях ад майстра да дырэктара, быў адносна даступны. Да Мацкевіча ж было проста не патрапіць, калі ты не чалавек з яго атачэння».

Аднак тое, што ілюзій на выратаванне завода ўжо ні ў каго няма, стала зразумела са слоў супрацоўніка, калі яму патэлефанавалі для ўдакладнення.

- Кісель адразу сказаў, што з 20 млрд рублёў запазычанасці [гаворка ідзе аб памеры выплат па крэдытах з адсоткамі] прадпрыемству самастойна не выбрацца. Але ж ніхто і не выцягваў цэлы год! Мы думалі, што нашы новыя партнёры нас навучаць працаваць па-новаму, а пакуль складваецца так, што гэта ім самім трэба вучыцца.

Цяпер мы разліваем толькі для «Аазіс груп», якая, падобна, не вельмі стараецца. У параўнанні са снежнем мінулага года яны ўзялі на рэалізацыю ў два разы менш піва. Складваецца адчуванне, што для іх «чым горш, тым лепш, - сказаў ён.

- Вы згодны з тым, што яшчэ да з'яўлення трэціх кампаній статыстыка працы «Берасцейскага піва» не была станоўчай у дынаміцы?

- Так, вытворчасць скарачалася і да гэтага. Усё ж такі ў краіне занадта вялікая дзель імпартнага піва. Аднак за апошні год зроблена амаль усё, каб сваімі рукамі зрабіць яшчэ горш. Завод тэхнічна мадэрнізаваны і гатовы да працы. Засталося навучыцца прадаваць. Але калі тое, што дэманструе «Аазіс груп», сёння называецца падтрымкай і развіццём піваварнай галіны, то я сабе гэты працэс прадстаўляў некалькі інакш.

Фармальна «Аазіс» на нашай тэрыторыі здымае склад і офісы, але супрацоўнікі гэтай кампаніі ходзяць тут ужо з выглядам абсалютных гаспадароў. Будучы арандатарамі, даюць нам план па разліву піва. Напрыклад, сёння ў нас гатова 8000 дал піва, а яны даюць план на 4 тысячы. Куды падзець другую палову, трэба будзе вырашаць кіраўніцтву.

Заробак упершыню за многія гады выдалі па частках напярэдадні Новага года. Пра аванс сказалі забыцца. У лютым і сакавіку мы будзем працаваць з 4-дзённым працоўным тыднем, кантракты з работнікам не падаўжаюцца.

- Вы дапускаеце, што прыход інвестара дапаможа прадпрыемству і наладзіць справу?

- Пакуль справы ідуць ўсё горш і горш. Гэта падобна на адмысловае давядзенне прадпрыемства да банкруцтва з мэтай наступнай куплі за капейкі. Што «Аазіс» можа, нам невядома. Ніхто нічога не кажа і планамі не дзеліцца, хаця сярод работнікаў велізарная колькасць акцыянераў «Берасцейскага піва». Адны чуткі.

Прадстаўнікі «Аазіс груп» адмовіліся ад каментароў на гэтую тэму, паабяцаўшы, што ў хуткім часе «адкажуць на ўсе пытанні ў інтэрв'ю».

Фота: bdg.by