Работнік ГЦ «Шчасце»: Было 2-3 стрэлы
46- 2.10.2014, 12:20
- 64,819
Захопнік закладніцы ў ГЦ «Шчасце» цяпер знаходзіцца ў рэанімацыі.
У спробах высвятліць, што значыць «захопнік нейтралізаваны», журналіст charter97.org звярнуўся па тлумачэнні ў СК і прэс-службу ГУУС. Прэс-сакратар менскай міліцыі Аляксандр Ластоўскі сцвярджае, што «накшталт, выносілі жывога», аднак дакладна не можа пацвердзіць або зняпраўдзіць гэтую інфармацыю ніхто, у тым ліку і Следчы камітэт:
«Пакуль няма ніякіх падрабязнасцяў, калі з'явяцца, мы паведамім», - сказалі там.
Журналіст сайта charter97.org адшукаў работніка ГЦ «Шчасце» Віталя. Сам ён у той дзень не быў на месцы, аднак ягоныя калегі распавялі яму тое, што бачылі на свае вочы.
«Адна аб'ектыўная рэч такая ёсць: адзін чалавек быў на самай справе зачынены ў боксе, даслоўна ў некалькіх метрах адкрываліся дзверы і было два-тры стрэлы - гэта 100%. Таксама яго дакладна выносілі праз задні дворык», - паведаміў ён.
Супрацоўніца сталічнай службы хуткай дапамогі просіць пачакаць і ператэлефанаваць, таму што пры патрэбным запыце у яе ўвесь час «вісне» кампутар.
«З гэтага адрасу ўчора прывезлі адну пацярпелую ў стацыянар пятай бальніцы, другога туды ж. Імёны не пазначаныя», - паведаміла яна.
Пра гэта журналісту charter97.org паведаміла старэйшая медсястра аперблока аддзялення нейрахірургіі бальніцы Святлана Брот.
«Учора ў нас аперавалі маладога чалавека. Цяпер ён у рэанімацыі», - паведаміла яна.
Нагадаем, учора а 13:00 у менскім гандлёвым цэнтры «Шчасце» непадалёк ад метро «Усход» адбыўся захоп закладніцы. Узброены мужчына напаў на касірку абменніка, праз тры з паловай гадзіны сілавікі паведамілі, што яго «абясшкодзілі».