Эрдаган прыедзе ў Беларусь
- 20.10.2014, 9:05
- 3,960
Прэзідэнт Турцыі Рэджэп Таіп Эрдаган наведае Беларусь з афіцыйным візітам.
Пра гэта паведаміў у праграме «Галоўны эфір» тэлеканала «Беларусь 1» старшыня «савета рэспублікі» Анатоль Рубінаў, паведамляе БелаПАН.
14-16 кастрычніка чыноўнік наведваў Турцыю на чале з беларускай «парламенцкай» дэлегацыяй. Падчас гэтага візіту адбылася ягоная сустрэча з прэзідэнтам гэтай краіны. Са слоў спікера верхняй палаты беларускага «парламента», Рэджэп Таіп Эрдаган разглядае Беларусь у якасці асноўнага партнёра на паўночным кірунку.
Пасол Беларусі ў Турцыі Андрэй Савіных распавёў, што цяпер абмяркоўваюцца перспектывы стварэння ў гэтай краіне сумесных прадпрыемстваў вытворчасці грузавых аўтамабіляў, аўтобусаў, будаўнічай тэхнікі. Такое супрацоўніцтва, з ягоных слоў, дазволіць Беларусі ў далейшым выйсці на рынкі Блізкага Усходу і Афрыкі.