Лукашэнка павіншаваў сябра Маралеса
6- 26.10.2014, 10:07
- 5,245
Беларускі дыктатар павіншаваў кіраўніка Балівіі Эва Маралеса з днём нараджэння.
Як паведамілі charter97.org у яго прэс-службе, Лукашэнка падкрэсліў, што «Балівія дасягнула значных поспехаў у палітычным і эканамічным развіцці, цвёрда ідзе шляхам рэформаў і ўмацавання аўтарытэту на міжнароднай арэне».
Паводле звестак BBC, нягледзячы на багацце мінеральных і энэргетычных рэсурсаў, Балівія з'яўляецца адной з самых бедных краін Паўднёвай Амерыкі.
Палітычная і эканамічная сітуацыя ў краіне гістарычна знаходзіцца пад кантролем прадстаўнікоў гарадской эліты пераважна гішпанскай крыві, у той час як большасць простых балівійцаў ледзь зводзяць канцы з канцамі.
Сёння Балівія займае другое месца ў Паўднёвай Амерыцы ў запасах прыроднага газу, аднак у краіне ўжо доўгі час вядуцца спрэчкі з нагоды яго здабычы і экспарту. У процівагу ўраду, карэнныя народы заклікаюць утрымліваць манаполію на распрацоўку радовішчаў, паколькі, на іх думку, газ - адзіная пакінутая на тэрыторыі дзяржавы крыніца прыроднага багацця.
Да прыходу да ўлады прэзідэнта Эва Маралеса ў выніку гэтых рознагалоссяў былі зрынутыя два ягоныя папярэднікі. Наступствы спрэчак таксама абумовілі патрабаванні рэгіянальнай аўтаноміі, у тым ліку і ў багатай нафтаздабываючай правінцыі Санта-Крус.
У траўні 2006 года прэзідэнт Маралес шакаваў сваіх міжнародных партнёраў, заявіўшы аб нацыяналізацыі сектара энэргетыкі. Замежным кампаніям было адведзена шэсць месяцаў на тое, каб перадаць пад дзяржаўны кантроль, прынамсі, 51% сваіх актываў, абмеркаваць умовы новых дамоваў ці, у адваротным выпадку, пакінуць тэрыторыю краіны.
Балівія з'яўляецца трэцім пасля Калумбіі і Перу сусветным вытворцам кокі, з якой пасля атрымліваюць какаін.
Фота з архіву