Турчынаў: Большасць у Вярхоўнай Радзе будзе праеўрапейскай
2- 26.10.2014, 14:10
- 5,541
Кіраўнік парламента Аляксандр Турчынаў спадзяецца, што паводле вынікаў пазачарговых выбараў у Вярхоўнай Радзе створаць стойкую праеўрапейскую патрыятычную большасць.
Пра гэта ён заявіў пасля галасавання на сваім выбарчым участку ў нядзелю журналістам, паведамляе «Украінская праўда».
«Гэта большасць пойдзе шляхам абнаўлення ўлады ва Украіне», - сказаў Турчынаў.
Ён адзначыў, што большасць сфармуе ўрад - і Украіна, паводле яго пераканання, пойдзе шляхам абнаўлення і пабудовы новай, моцнай і незалежнай дзяржавы.
«Праходзяць пазачарговыя выбары, і менавіта пасля іх будзе зроблены сур'ёзны крок да абнаўлення ўкраінскай улады», - заявіў Турчынаў.
«Мы яшчэ не ведаем, якія сілы пераадолеюць сёння пяціадсоткавы бар'ер, але ўжо сёння ўвечары дзякуючы вынікам экзіт-полаў архітэктура будучага парламента будзе вядомая», - сказаў цяперашні спікер парламента.
Турчынаў перакананы, што выбары ва Украіне будуць адбывацца сумленна, празрыста, без фальсіфікацый, а ў выпадку спробаў парушэнняў выбарчага заканадаўства праваахоўныя органы «дастаткова жорстка будуць рэагаваць на такія выпадкі».
Кіраўнік парламента нагадаў, што нядаўна прынятыя змены ў заканадаўства, якія істотна ўзмацняюць адказнасць за фальсіфікацыі і іншыя парушэнні выбарчага закона.
На пытанне, ці гатовы ён ачоліць Вярхоўную Раду новага склікання, Турчынаў адказаў, што новая парламенцкая большасць сама вызначыць кіраўніцтва парламента.
Турчынаў галасаваў на пазачарговых парламенцкіх выбарах з жонкай, а яго сын галасаваў па месцы праходжання службы ў Нацыянальнай гвардыі Украіны, гаворыцца ў паведамленні.