«Нафтан» аддаў запазычанасці дагаворным матчам?

Гульня клубаў «Гомель» - «Нафтан» выбіла букмекераў з каляіны.

Матч 28-га тура чэмпіянату Беларусі «Гомель» - «Нафтан» апынуўся адзначаны рэзкімі ваганнямі каэфіцыентаў у букмекерскіх канторах і сур'ёзнымі сумамі на біржах ставак, піша «Прессбол».

Раніцай у дзень нядзельнай гульні каэфіцыент на чыстую перамогу гамяльчан у канторах Беларусі і еўрапейскага замежжа складаў 2,3-2,55. Прыблізна за тры гадзіны да пачатку сустрэчы максімальны каэфіцыент быў на ўзроўні 1,69, пасля чаго пайшоў уніз гэтак імкліва, што многія канторы знялі матч з лініі і не сталі адкрываць прыём ставак у онлайн-рэжыме. Такія тэндэнцыі звычайна сведчаць пра сумневы аналітыкаў у тым, што адна каманда зможа аказаць годны супраціў іншай.

На адной з самых аўтарытэтных біржах ставак Betfair матч «Гомель» - «Нафтан» карыстаўся павышаным попытам, калі параўноўваць з астатнімі сустрэчамі беларускага першынства. Прыкладна за дзве гадзіны да пачатку гульні біржа фіксавала суму блізу 50 тысяч даляраў, прычым 95 адсоткаў гэтага пула былі на карысць «Гомеля», які да паядынку з наваполацкай камандай не набраў на другім этапе чэмпіянату Беларусі ні аднаго бала.

У выніку ў матчы 28-га тура чэмпіянату Беларусі ў футболе «Нафтан» у гасцях моцна саступіў «Гомелю» - 0:3.