Працоўны «Аўтагідраўзмацняльніка»: Мы не можам пракарміць свае сем'і

Ужо трэці год на прадпрыемстве катастрафічныя ўмовы працы: трохдзёнка, прастоі, затрымкі заробкаў.

Пра гэта charter97.org паведамляе чытач, супрацоўнік ААТ «Барысаўскі завод «Аўтагідраўзмацняльнік».

30 жніўня 2011 года Указам №388 Лукашэнкі быў створаны холдынг «Аўтакампаненты», у склад якога ўвайшоў завод «Аўтагідраўзмацняльнік» і яшчэ 11 іншых прадпрыемстваў. І гэта, на думку чытача, пацягнула за сабой масу непрыемнасцяў для супрацоўнікаў.

«З моманту ўваходжання ў гэты холдынг сітуацыя на заводзе стала катастрафічна пагаршацца: павышэння заработнай платы не было апошнія тры гады. Таксама пачаліся скарачэнні людзей. Як толькі чалавек звальняецца з завода, скарачаецца вакансія. Крэдыторская запазычанасць расце з месяца ў месяц, пачаліся то трох-, то чатырохдзёнкі, грошы за адпачынак і бальнічныя выплачваюцца з затрымкай. Дайшло да таго, што пачаліся затрымкі з выплатай нашага жабрацкага заробку.

Так, пасля адной з такіх затрымак, пачалася забастоўка на прадпрыемстве, пра што пісалі на charter97.org. На сённяшні дзень заробку за мінулы месяц усё яшчэ няма, хоць паводле калектыўнай дамовы ён павінен быць выплачаны цалкам да 25 кастрычніка. Як у такой сітуацыі працаўнікі завода могуць своечасова аплаціць камунальныя паслугі? Як увогуле можна пракарміць свае сем'і, не кажучы ўжо пра тых, у каго маленькія дзеці?», - Здзіўляецца чытач.

Таксама супрацоўнік заводу паведамляе, што з сённяшняга дня і да канца месяца практычна ўсіх працаўнікоў завода адправілі на прастоі, не афармляючы спецыяльнага загаду.

«Нельга сказаць, што гэтая сітуацыя залежыць толькі ад ўваходжання нашага прадпрыемства ў холдынг «Аўтакампаненты». Зразумела, нямала ўплываюць тэндэнцыі, якія адбываюцца агулам на прамысловых прадпрыемствах, але прынамсі сітуацыя, якая склалася, у значнай ступені адбілася на працы завода і дабрабыце супрацоўнікаў», - піша ён.

Нагадаем, у краіне ўжо некалькі месяцаў запар паступаюць паведамленні аб пераводзе прадпрыемстваў на чатырох- і трохдзёнку, пра няпоўныя выплаты заробкаў і аб іх памяншэнні, а таксама аб прымусовым выпраўленні ў адпачынак за свой кошт.