Forbes: Новая Рада дазволіць супрацьстаяць Пуціну

Новая Вярхоўная Рада будзе супрацьстаяць прэзідэнту РФ Уладзіміру Пуціну і абараняць Украіну.

Пра гэта піша Пол Радэрык Грэгары ў сваім артыкуле, апублікаваным на сайце Forbes.com, прысвечаным выбарам ва Украіне, адзначае УНІАН.

Журналіст нагадвае, што, згодна з украінскім законам аб выбарах, 225 дэпутатаў абіраюцца паводле партыйных спісаў і 225 у аднамандатных акругах. Не атрымалася правесці выбары ў 27 акупаваных акругах у Крыме і ў Данбасе, а жыхары на вызваленых тэрыторыях Данецкай і Луганскай абласцей галасавалі ў атмасферы бязладзіцы і пагроз, калі наогул прыходзілі на выбарчыя ўчасткі. У агульнай складанасці 4,8 млн выбаршчыкаў у акупаваным Крыме, Данецкай і Луганскай абласцях (каля 10% насельніцтва) не змаглі прагаласаваць. Адпаведна, 27 месцаў у парламенце сімвалічна застануцца вакантнымі. Нягледзячы на складаныя ўмовы, яўка выбаршчыкаў па ўсёй краіне перавысіла 40% (на самай справе, яна склала больш за 50%).

Пасля закрыцця выбарчых участкаў, былі прадстаўленыя вынікі выбараў паводле партыйных спісаў экзіт-полаў. Афіцыйныя вынікі павінны абвясціць у панядзелак. Назіральнікі паведамілі аб тым, што выбаршчыкам і чальцам выбарчых камісій у Данецкай і Луганскай абласцях пагражалі, але ўсё ж, большасць прыкмет паказваюць на тое, што гэтыя выбары былі законнымі, што, безумоўна, пацвердзяць назіральнікі ад АБСЕ ў афіцыйным дакладзе.

«Датэрміновыя парламенцкія выбары былі неабходны для таго, каб даць прадстаўнічай дэмакратыі шанец паказаць новую празаходнюю арыентацыю Украіны, як падкрэсліў Джордж Сорас, а таксама адрэагаваць на выклікі, звязаныя з акупацыяй яе тэрыторый, прысутнасцю расейскіх войскаў у краіне, спрэчкамі аб пастаўках газу і агрэсіяй з юоку Расеі, якая працягваецца або пашыраецца. Нягледзячы на тое, што многія выйшлі з Партыі Рэгіёнаў пасля таго як Віктар Януковіч збег з Украіны, прэзідэнту Пятру Парашэнку давялося супрацьстаяць моцнаму блоку дэпутатаў, якія выступаюць супраць рэформаў і жорсткай рэакцыі на расейскую агрэсію», - гаворыцца ў артыкуле.

Як адзначае журналіст, Парашэнка атрымаў тое, што яму было трэба. Яго ўласны блок і партыя прэм'ер-міністра Яцэнюка атрымалі разам 44% галасоў. Партыя «Самадапамога» на чале з празаходнім мэрам Львова, якая нечакана атрымала вельмі моцную падтрымку на выбарах, дае яму кааліцыю з 57% галасоў - парламенцкую большасць, усе чальцы якой падзяляюць агульныя погляды на палітыку ў дачыненні да Захаду і Расеі.

«Важна адзначыць, што Парашэнку для яго кіруючай кааліцыі не патрэбныя абедзве «радыкальныя» партыі, якія былі ў выбарчым спісе і якія разам набралі 12% галасоў. Абедзве гэтыя партыі, аднак, праходзяць у парламент, і будуць аказваць вельмі моцны ціск на кіруючую большасць, калі яна праявіць слабасць у дачыненні да Расеі. Апазіцыйны блок, у які ўвайшлі дэпутаты з паўднёва-ўсходніх абласцей, атрымаў толькі 8% галасоў, а партыя былой буйной палітычнай фігуры Юліі Цімашэнкі атрымала ўсяго толькі 6%, нягледзячы на тое, што яе спіс узначальвае ваенная гераіня. Выбаршчыкі кажуць Цімашэнцы, што ў яе быў шанец, але яна не апраўдала надзей», - піша Forbes.

Акрамя таго, упершыню ў гісторыі Камуністычнай партыі не ўдалося пераадолець 5-працэнтны бар'ер, падкрэсліў журналіст.

«Расейская прапаганда актыўна рыхтавалася да таго, што дзве «радыкальныя» партыі атрымаюць нашмат больш галасоў, і адна ці абедзве далучацца да кіруючай кааліцыі. Тролі Пуціна ўжо падрыхтаваліся галасіць пра тое, што неанацысты і расавыя экстрэмісты кантралююць украінскі ўрад, але тыя, хто ведаюць сапраўдныя вынікі выбараў, прапусцяць гэтыя абвінавачванні міма вушэй», - гаворыцца ў артыкуле.

«На самой справе, папярэднія апытанні грамадскай думкі паказвалі, што «Радыкальная партыя» на чале з Алегам Ляшко, павінна была атрымаць другое месца. Нескладана зразумець прычыны яго папулярнасці. Ляшко арганізаваў добраахвотніцкі батальён (гэтая інфармацыя, як вядома, не пацвярджаецца - рэд. ) і сам браў удзел у антытэрарыстычнай аперацыі ва ўсходняй Украіне. Для многіх украінцаў Ляшко з'яўляецца эквівалентам Мінітменаў Амерыканскай рэвалюцыі, але калі прыйшоў час выбараў, украінцы прагаласавалі за вядучыя партыі. Магчыма, яны зразумелі, што Ляшко ў кіруючай кааліцыі будзе вельмі вялікім падарункам для расейскай прапаганды», - піша Пол Радэрык Грэгары.

Паводле інфармацыі выдання, заходнія экспэрты ўжо пачалі скардзіцца, што абранне празаходняга парламента ўяўляе сабой пагрозу ўрэгулявання крызісу. Карэспандэнт часопіса Time Magazine мяркуе, што паколькі прарасейскія выбаршчыкі засталіся «за бортам» гэтых выбараў (іх самаабвешчаныя лідары наважылі іх байкатаваць), яны не змогуць склеіць распаўшаеся таварыства.

«З самага пачатку расейскія СМІ наважылі раздуць непраўдзівую навіну пра тое, што, нібыта па паведамленнях украінскіх СМІ, вынікі выбараў будуць сфальсіфікаваныя, і што, правёўшы гэтыя выбары, Украіна аддзялілася ад Данбаса. Самая папулярная ў Расеі інфармацыйная перадача «Весці» адлюстравала выбары, як дзікія беспарадкі, пустыя скрыні, зверствы, катастрофы, забарону партый, плату сябрам выбарчых камісій за знішчэнне бюлетэняў і гэтак далей. З іншага боку, прасепаратысцкія выбары, якія маюць адбыцца ў Данецкай і Луганскай абласцях будуць «чыстымі, як свежы снег», паведамляюць «Весці». Характэрна, што ў перадачы нават не згадалі пра сапраўдныя вынікі выбараў», - гаворыцца ў артыкуле.

«Мы ўсё яшчэ чакаем рэакцыі Пуціна. Ён павінен прыняць складаную пастанову аб тым, ці варта прызнаць вынікі выбараў - і прызнаць легітымнасць Украіны як суверэннай дзяржавы - ці працягваць пераконваць усіх у нелегітымнасці ўкраінскага ўрада. Я ўпэўнены, што Еўропа і ЗША ўважліва сочаць за яго рэакцыяй», - адзначыў журналіст Forbes.