Прагноз Goldman Sachs ударыў па цане на нафту

Цэны на нафту пасля нязначнага росту ў панядзелак зноў пайшлі ўніз.

Кошт снежаньскіх ф'ючэрсаў на паўночнаморскую нафтавую сумесь маркі Brent паводле стану на 14:38 маскоўскага часу зніжаўся на 0,97%, кошт снежаньскіх ф'ючэрсаў на амерыканскую лёгкую нафту маркі WTI (Light Sweet Crude Oil) памяншаўся на 0,72%, паведамляе РІА "Новости".

За некалькі гадзін да гэтага амерыканскі інвестыцыйны банк Goldman Sachs панізіў прагноз цаны на нафту на 2015 год. Зыходзячы з падзення кошту нафты на 25% за апошнія пяць месяцаў, банк заявіў, што вытворчасць, якая расце, будзе апярэджваць попыт.

Аналітыкі Goldman Sachs звязваюць зніжэнне нафтавых коштаў з ростам эканомікі ЗША, умацаваннем даляра, высокай прапановай і наяўнасцю запасаў нафтапрадуктаў.

У дакладзе, апублікаваным аналітыкамі Goldman позна ўвечары ў нядзелю, гаворыцца, што яны чакаюць, што цана на нафту маркі WTI ўпадзе з 90 да 75 даляраў за барэль, а Brent - да 85 са 100 даляраў у I квартале 2015 года.

У Goldman Sachs таксама адзначылі, што Арганізацыя краін-экспарцёраў нафты (АПЕК) губляе свой уплыў на нафтавы рынак у сувязі з ростам канкурэнцыі пасля сланцавай рэвалюцыі ў ЗША. Чальцы арганізацыі больш заклапочаныя захаваннем сваёй дзелі на сусветным рынку, чым зніжэннем коштаў, а таму адмаўляюцца істотна скарачаць аб'ёмы нафтаздабычы.

Вытворчасць нафты ў ЗША выйшла на максімумы за мінулыя 30 гадоў, і Goldman Sachs не чакае запаволення здабычы. Рэакцыяй найбуйнейшых чальцоў АПЕК на падзенне кошту нафты за апошні час на 40% стала не скарачэнне здабычы, а зніжэнне цаны ў кантрактах на пастаўку сыравіны ў імкненні захаваць свае дзелі рынку, што кажа аб узрослай канкурэнцыі. Таму аналітыкі банка лічаць, што картэль страціць пазіцыю гульца, здольнага дыктаваць рынку сваю волю, чакаючы адначасовага ўзмацнення на ім пазіцыі ЗША.

Goldman Sachs, праўда, мяркуе, што скарачэнне здабычы нафты з боку АПЕК у кароткатэрміновай перспектыве будзе невялікім. Паводле прагнозаў банка, здабыча ў ЗША пачне скарачацца толькі пасля падзення коштаў на WTI ніжэй за ўзровень 75 даляраў за барэль. Аналітыкі чакаюць таксама павелічэння вытворчасці сыравіны краінамі, якія не ўваходзяць у АПЕК: Бразіліяй, Мексікай і Азербайджанам.

Усё гэта прывядзе да перанасычэння рынка ў 2015 годзе. У выніку сусветным вытворцам нафты, хутчэй за ўсё, прыйдзецца скараціць здабычу амаль на 800 тыс. барэляў у дзень ў наступным годзе, каб абмежаваць рост запасаў і збалансаваць нафтавы рынак у 2016 годзе.