«Белавія» перайшла на зімовы расклад
2- 27.10.2014, 20:57
- 4,688
Зімовы расклад авіякампаніі будзе актуальны да 28 сакавіка 2015.
Паводле інфармацыі прэс-службы арганізацыі, у гэтым сезоне «Белавія» запланавала больш рэйсаў з Менска ў Амстэрдам, Будапешт, Варшаву, Санкт-Пецярбург, Астану. З 26 кастрычніка рэйс у Кастанай будзе выконвацца цэлы год, піша БелаПАН.
«Белавія» прыняла рашэнне на перыяд навагодніх свят значна павялічыць частату выканання палётаў па найбольш запатрабаваных у турыстаў маршрутах і замяніць паветраныя суды на больш ёмістыя.
«Летні сезон быў для нас напружаным. Мы адкрылі два новыя напрамкі (Ніца і Краснадар), павялічылі частату выканання рэйсаў па найбольш запатрабаваных маршрутах. Істотна павялічылі колькасць і геаграфію выканання чартэрных рэйсаў, у тым ліку з абласных гарадоў. У мінулым сезоне беларусы ўпершыню атрымалі магчымасць вылятаць з Менска для адпачынку ў Румынію і Туніс. Мы чакаем, што зімовы сезон, які надыходзіць, стане паспяховым прадаўжэннем летняга. Традыцыйна ў перыяд калядных вакацый па самых папулярных маршрутах мы будзем выконваць дадатковыя рэйсы. Хачу адзначыць, што ў зімовы перыяд мы пастараемся прыемна здзівіць нашых кліентаў коштам білетаў», - паведаміў генеральны дырэктар «Белавія» Анатоль Гусараў.
Падчас зімовага сезона значна павялічыцца колькасць рэйсаў у рамках ужо традыцыйных чартэрных праграм у Егіпет (Хургада, Шарм-эль-Шэйх). Упершыню ў зімовым сезоне будуць выконвацца рэйсы з Брэста і Гомеля ў Хургаду. У перыяд навагодніх свят беларусы змогуць выляцець з Менска на адпачынак у Грэцыю (Салонікі), Туніс (Энфіда), Турцыю (Анталія) і Аўстрыю (Зальцбург).