Лаўроў: Упэўнены, нам будзе з кім размаўляць у Вярхоўнай Радзе
15- 29.10.2014, 9:52
- 7,887
Масква разлічвае на тое, што ключавыя пасады ва ўрадзе Украіны зоймуць прадстаўнікі Блока Парашэнкі.
Кіраўнік расейскага замежнапалітычнага ведамства Сяргей Лаўроў у эксклюзіўным інтэрв'ю газеце «Известия» і тэлеканалу LifeNews распавёў, з кім з украінскіх палітыкаў Масква гатовая размаўляць аб нармалізацыі стасункаў.
«Украінскі ўрад не заўсёды падтрымліваў мірную лінію, не кажучы ўжо пра выхад Арсенія Яцанюка і Аляксандра Турчынава з партыі «Батькивщина» і стварэнні імі «Народного фронта». Працуючы да выбараў на пасадах адпаведна прэм'ер-міністра і спікера Вярхоўнай рады да выбараў, яны перыядычна сумняваліся ў кроках Парашэнкі, у тым ліку ў рэалізацыі Менскіх дамоўленасцей і знаходжанні кампрамісу ў газавай праблеме. Яны казалі, што Расея ніколі не пагодзіцца дамаўляцца з Украінай наконт газу. А нядаўна Яцанюк заявіў, што мэта Масквы - замарозіць Украіну. Для адказнага палітыка гэта цалкам пачварныя выказванні.
Калі ў адпаведнасці з Менскімі дамоўленасцямі прэзідэнт Парашэнка правёў праз Вярхоўную раду і падпісаў закон аб адмысловым парадку мясцовага самакіравання на тэрыторыях, якія кантралююцца апалчэнцамі, міністр унутраных спраў Арсен Авакаў публічна заявіў, што не будзе выконваць гэты закон. Спадзяюся, што адным з пазітыўных вынікаў выбараў будзе фармаванне ўрада аднадумцаў у рэчышчы лініі, якая вызначаецца Парашэнкам», - заявіў ён.
Акрамя таго, Лаўроў заявіў, што вядучай сілай парламент стане менавіта БПП.
«Упэўнены, што нам будзе з кім размаўляць у Вярхоўнай Радзе і ўрадзе, перш за ўсё таму што вядучай сілай украінскага парламента ў любым выпадку стане «Блок Пятра Парашэнкі», які з'яўляецца партнёрам Расеі і прэзідэнта Уладзіміра Пуціна ва ўзгадненні ў Менску мірных дамоўленасцей паміж кіеўскімі ўладамі і апалчэнцамі Луганска і Данецка, дасягнутых пры садзейнічанні Расеі і АБСЕ.
Пётр Парашэнка неаднаразова, у тым ліку на сустрэчы 17 кастрычніка ў Мілане з Уладзімірам Пуціным і ў больш шырокім так званым нармандскім фармаце, пацвярджаў сваю прыхільнасць выкананню гэтых дамоўленасцей. Разлічваю, што ўрад, які ў выніку будзе сфармаваны (ён непазбежна павінны быць кааліцыйным), усё ж такі будзе ўключаць у сябе міністраў, прыхільных да гэтага курсу прэзідэнта на дасягненне міру, аднаўленне нацыянальнай згоды і прымірэння на Украіне. Прынамсі, Парашэнка ў сваіх кантактах з расейскім прэзідэнтам цвёрда заяўляе, што вайсковага рэцыдыву не дапусціць. Гэта, вядома, цяпер самае галоўнае», - сказаў Сяргей Лаўроў.