Рассельгаснагляд знайшоў АЧС у прадукцыі Бабруйскага мясакамбіната

У Беларусі знойдзены чацвёрты выпадак выяўлення геному афрыканскай чумы свіней у мясной прадукцыі.

Услед за Аршанскім, Менскім і Магілёўскім мясакамбінатамі ў "чорны спіс" патрапіў Бабруйскі мясакамбінат, піша "Інтэрфакс".

Пра гэта намесніца кіраўніка службы, галоўны ветэрынарны інспектар Расеі Яўген Непаклонаў праінфармаваў свайго беларускага калегу Васіля Півавара. Пры гэтым ён адзначыў, што наяўнасць геному АЧС з'яўляецца сур'ёзным парушэннем ветэрынарна-санітарных патрабаванняў Мытнага саюза і Расеі, уяўляе пагрозу далейшага распаўсюджвання афрыканскай чумы свіней.

У гэтай сувязі Рассельгаснагляд просіць ветэрынарную службу Беларусі правесці расследаванне па ўсталяванні прычын наяўнасці геному АЧС у прадукцыі Бабруйскага і Магілёўскага мясакамбінатаў і прыняць меры ў недапушчэнні паставак у Расею беларускай прадукцыі, якая не адпавядае ветэрынарна-санітарным патрабаванням і нормам.

У сувязі з сур'ёзнасцю сітуацыі, якая склалася на працягу апошніх некалькіх дзён кіраўнік Рассельгаснагляду Сяргей Данкверт правёў некалькі тэлефонных перамоваў з міністрам сельскай гаспадаркі Беларусі Леанідам Зайцам, а яго намеснік Яўген Непаклонаў - з кіраўніцтвам беларускай ветэрынарнай службы.

Як ужо паведамлялася, для недапушчэння магчымага заносу віруса АЧС на тэрыторыю краіны Рассельгаснагляд абавязаў адбіраць пробы гатовай свінагадоўчай прадукцыі, выпрацаванай на прадпрыемствах у Менскай, Віцебскай, Гарадзенскай, Гомельскай і Магілёўскай абласцях. Неабходна адбіраць не менш за адну пробу ад пяці партый прадукцыі. Запіс з указаннем рэквізітаў акта адбору пробаў павінен быць зроблены на адваротным баку ветэрынарных суправаджальных дакументаў.