Крамлёўскія тролі: тэхналогія працы

250 чалавек, змяняючы адзін аднаго раз у 12 гадзін, кругласутачна пішуць паведамленні і каментары пракрамлёўскага характару ў сацсетках.

«Деловой Петербург» пагаварыў з двума былымі «тролямі на зарплаце» і даведаўся, колькі плацяць за станоўчыя паведамленні пра Уладзіміра Пуціна.

Супрацоўнікі ТАА «Інтэрнэт Даследаванні», распавядаюць, што ўладкаваліся на працу, не ведаючы, пра што трэба будуць пісаць. Са слоў Д. (суразмоўцы не раскрываюць сваіх імёнаў), ёй паведамілі, што яна будзе весці «жывы часопіс» «як хатняя гаспадыня, толькі з офіса»; тэставае заданне таксама не датычылася палітыкі.

Штатны блогер павінен выдаваць дзесяць паведамленняў у дзень на розную тэматыку, часцей за ўсё - рэакцыю на навіны з «правільнымі высновамі». «Мы працавалі па 12 гадзін два праз два. У блогера норма - 10 паведамленняў у дзень, 750 сімвалаў мінімум, у каментатара - 126 каментароў і два паведамленні. У блогера ў распараджэнні тры акаўнты. 10 ТЗ яму трэба паміж імі размеркаваць. ТЗ складаецца з тэзіса нейкага, часцей за ўсё навіны, і вываду, да якога ты павінен прыйсці. Гэта значыць, трэба падагнаць рашэнне пад адказ. Умоўна, ты пішаш, што спёк сёння смачныя піражкі, а ў канцы - як добра ў Расеі жыць, а Пуцін добры», - распавядае Д.

Гэта завод поўнага цыкла: адны пішуць паведамленні, іншыя каментуюць. Часцей за ўсё адзін аднаго. Са слоў Д., каментатарам працаваць весялей. «Чапляўся за розную аўтарскую бугага. Але ў канцы павінен каго-небудзь з уладаў усё ж пахваліць. У каментатара галоўная задача стварыць хваляванне пад паведамленнем, якое без гэтага нікому і не патрэбнае. Накідвацца на топавых блогераў у нашы задачы не ўваходзіла. Бачыш нейкія відавочныя нестыкоўкі: стылістыку дзікую, непісьменнасць - і лаеш аўтара», - распавядае Д.

У асноўным, тэматыка тэхнічных заданняў тычылася Сірыі, тых ці іншых дзеянняў Пуціна, асуджэння палітыкі прэзідэнта ЗША Барака Абамы. Кіраўнікі фірмы прасілі станоўча выказвацца аб далучэнні Крыму. Заданняў пісаць што-небудзь пра лідараў расейскай апазіцыі, у тым ліку Аляксея Навальнага, не было.

У кампаніі вядзецца «ідэалагічная праца» з супрацоўнікамі, з лекцыямі перад платнымі блогерамі выступаюць палітолагі. Аднак, як правіла, у «Інтэрнэт Даследаваннях» працуюць не з перакананняў, а дзеля высокай паводле мерак Пецярбурга зарплаты - каля 40 тысяч руб. у месяц.

Са слоў суразмоўцаў выдання, нядаўна кампанія пачала эканоміць на ўсім, сталі часта штрафаваць за спазненні, увялі катэгорыі якасці для паведамленняў. Праз гэта многія пачалі звальняцца.

«Агульнае адчуванне? Агіда. Зарплата была прывабнай, нічога не папішаш. Мы тут не ўнікальныя цалкам. Змагацца з агідай можна вельмі доўга. Многія жывуць так гадамі. Лаюць нялюбую працу, але ідуць на яе раніцай. Нам жа больш гэтага не трэба», - падсумавала Д.