Падатковыя установы: Штрафы «дармаедам» павінны ў разы перавышаць падаткі

Гарадзенскія падатковыя службы прапануюць значна павялічыць сумы штрафаў.

Такое меркаванне, каментуючы даручэнне Лукашэнкі аб неабходнасці распрацаваць у краіне сістэму мер выкаранення ўтрыманства і дармаедства, выказала начальніца Інспекцыі Міністэрства падаткаў і збораў Гарадзенскай вобласці Лідзія Сямашка, піша БелТА.

З ейных слоў, у падатковых органах ёсць неабходныя рычагі ўздзеяння на асоб, якія займаюцца ценявым бізнэсам. Незаконна працуюць у розных сферах, гэта і інтэрнэт-гандаль, і таксі, і будаўнічыя паслугі, і іншыя. За студзень-верасень 2014 г падатковыя органы праверылі 4,5 тыс фізічных асоб, у больш чым 1,3 тыс. З іх выдаткі перавышаюць даходы. Выяўлена больш за 400 выпадкаў незаконнай прадпрымальніцкай дзейнасці, у 150 выпадках факты выяўленыя паўторна, суб'екты аштрафаваныя больш чым на Br200 млн.

Найбольш дзейснымі рычагамі ўздзеяння на ценявы бізнэс, на думку Лідзіі Сямашкі, з'яўляюцца істотнае павышэнне сумаў штрафных санкцый за нявыплату падаткаў і аплата ў поўным аб'ёме сацыяльных паслуг (адукацыйных, медыцынскіх) для неплацельшчыка і ягоных дзяцей.

«Мяркую, што сумы штрафаў павінны ў разы перавышаць самі падаткі, каб грамадзяне задумваліся, што ім больш выгадна - заплаціць падатак або штраф. Схаваў даход - заплаці штраф у падвойнай суме. І другая эфектыўная мера: калі грамадзянін афіцыйна не працуе, падаткаў не плаціць, адпаведных адлічэнняў у ФСАН не робіць, хай заплаціць у поўным аб'ёме за сваё дзіця ў дзіцячым садзе ці школе, за наведванне медустаноў. Як толькі ён аднойчы гэта зробіць, адразу ж зразумее, што яму прасцей працаваць легальна і плаціць падаткі», - сказала Лідзія Сямашка.

Пры гэтым начальнік інспекцыі падкрэсліла, што важна з дзяцінства прывіваць падатковую культуру і грамадзянскую адказнасць, даслоўна са школьнай лавы фармаваць імідж адказнага падаткаплацельшчыка. «Гэта вельмі важна, і мы праводзім вялікую тлумачальную працу з грамадзянамі, каб сфармаваць у іх пазітыўнае стаўленне да выплаты падаткаў, пачуццё гонару за тое, што яны сваёй працай падтрымліваюць паспяховае развіццё краіны», - адзначыла яна.

У Гарадзенскай вобласці, па самых агульных падліках, нідзе не працуюць 45-50 тыс. грамадзян.