Склады прадпрыемстваў Беларусі забітыя неліквідам

За студзень-верасень складскія запасы ў прамысловасці выраслі амаль на 19%, - да Br33,18 трлн.

Найбольшы рост запасаў гатовай прадукцыі на складах за студзень-верасень адзначаўся ў вытворчасці транспартных сродкаў і абсталявання (на Br1,9 трлн) і вытворчасці машын і абсталявання (на Br1,8 трлн). За дзевяць месяцаў 2014 складскія запасы грузавых аўтамабіляў (без кар'ерных самазвалаў) выраслі амаль на 1,8 тыс. штук, самазвалаў - на 349 штук, прычэпаў і паўпрычэпаў аўтамабільных - на 388 штук, аўтобусаў - на 222 штукі, трактароў - на 5, 4 тыс. штук, піша «Інтэрфакс».

Скараціліся складскія запасы у металургічнай вытворчасці і вытворчасці гатовых металічных вырабаў (на Br332,5 млрд) і вытворчасці іншых неметалічных мінеральных прадуктаў (на Br321,8 млрд).

Паводле звестак Белстата, на 1 кастрычніка ў гарбарна-абутковай прамысловасці складскія запасы складалі Br1,46 трлн, што ў 3,8 разы вышэй сярэднямесячнага аб'ёму вытворчасці, у вытворчасці машын і абсталявання - Br9,51 трлн (у 2,46 разы вышэй сярэднямесячнага аб'ёму ), у вытворчасці транспартных сродкаў і абсталявання - Br4 трлн (у 2,7 разы), у тэкстыльнай і швейнай вытворчасці - Br2,2 трлн (у 2 разы).

Раней урад Беларусі неаднаразова ставіў перад прамысловасцю задачу ў разгрузцы складоў і зніжэння аб'ёмаў знешняй дэбіторскай запазычанасці.