Ладуцька: Сітуацыя што да беларускіх тавараў - крытычная

Старшыня Мінгарвыканкама папярэдзіў пра магчымае прыпыненне «брэндавых прадпрыемстваў».

Пра гэта Мікалай Ладуцька заявіў учора на выязным пасяджэнні выканкама.

«Улічваючы тую крытычную сітуацыю, якая назіраецца ў прамысловай групе тавараў канцэрна «Беллегпрам», у нас ёсць прапанова да ўладальнікаў буйных сеткавых крамаў размясціць у сваіх гандлёвых аб'ектах секцыі для рэалізацыі беларускіх тавараў. Мы з вамі не маем права дапусціць, каб нашы брэндавыя прадпрыемствы замерлі. А ў многіх прадпрыемствах гаворка ідзе менавіта пра гэта. Каб трохі стабілізаваць сітуацыю, ім патрэбная невялікая падтрымка», - заявіў ён.

Падчас наведвання адкрытага акцыянернага таварыства «Абутакторг» кіраўнік Мінгарвыканкама адзначыў, што аб'ёмы продажаў імпартнага абутку ў горадзе павялічваюцца, у той час як айчыннага пастаянна зніжаюцца. «Сітуацыя проста катастрафічная. Пры такой колькасці ўласных вытворцаў абутку аб'ём імпарту павінен знаходзіцца на ўзроўні 30-35%», - падкрэсліў старшыня Мінгарвыканкама.

З ягоных слоў, каб айчынны тавар прадаваўся, трэба ствараць умовы. Напрыклад, пабудаваць гандлёвы цэнтр, які будзе займацца рэалізацыяй менавіта гэтых тавараў. Акрамя таго, на думку Мікалая Ладуцька, сёння прадпрыемствам неабходна больш актыўна працаваць з прыватнымі сеткамі, зацікавіць іх у рэалізацыяй айчыннай прадукцыі.

На сённяшні дзень ААТ «Абутакторг» супрацоўнічае з 115 індывідуальнымі прадпрымальнікамі і знаходзіцца ў дагаворных стасунках з 300 аптовымі пакупнікамі. Напярэдадні заканчэння тэрміну рэалізацыі індывідуальнымі прадпрымальнікамі рэшткаў тавараў лёгкай прамысловасці, увезеных у Беларусь да 1 ліпеня 2014 года і якія не маюць дакументаў аб іх адпаведнасці тэхнічным рэгламентам Мытнага саюза (да 1 сакавіка 2015 г.), цікавасць да супрацоўніцтва з «Абутакторг» у прадпрымальнікаў паступова ўзрастае.