Сёння ў Менску пройдзе «Дзень вышыванкі»

Фэст беларускай культуры праводзяць беларускія творцы ды ініцыятывы ў межах кампаніі «Зробім лепш».

На свяце прэзэнтуюць сваю прадукцыю стваральнікі і распаўсюднікі беларускага нацыянальнага адзення, музыкі і мастакі. Можна будзе купіць вышыванку ці яе сучасную стылізацыю, а таксама сувеніры з беларускім каларытам, перадае «Радыё Свабода».

Таксама чакаецца майстар-клас ад майстрыхі беларускіх вышыванак Настассі Глушко, а таксама Наталлі Русіян - у вырабах з гліны. Аўтары гульні «Паўстанцы» раскажуць пра свой праект, а Валерыя Тумаш, Мар’яна Валуева, Ірына Чачот пакажуць і навучаць, як рабіць тату хной або фарбамі.

У музычнай частцы, якая пачнецца а 18.00, выступяць гурты Unia, Recha, «Бачу ўпершыню» і Сяргей Башлыкевіч (Leibonik).

Фестываль будзе праходзіць з 15:00 да 22:00 у Прасторы «ДК» (вул.Талбухіна, 4; 3 паверх). Уваход вольны.