У ЗША затрыманы кіраўнік расейскай кампаніі TENAM

Затрыманне Вадзіма Мікерына было праведзенае 29 кастрычніка ў прыгарадзе Вашынгтона.

Кампанія TENAM з'яўляецца даччыным прадпрыемствам ААТ «Техснабэкспорт» у ЗША. Прадстаўнікі амбасады РФ заявілі, што затрыманаму грамадзяніну Расеі аказваецца ўся неабходная консульская і юрыдычная падтрымка, паведамляе ТАСС.

Вадзіма Мікерына абвінавацілі ў атрыманні хабару ад амерыканскіх грамадзян за выдачу ўранавых кантрактаў. Паводле справы таксама праходзяць два прадстаўнікі амерыканскай транспартнай кампаніі Transport Logistics International (TLI) Дарэн Кондры і Кэрал Кондры. TLI з 1996г. заключаў з ААТ «Техснабэкспорт», стоадсоткавай дачкой якога з'яўляецца TENAM, кантракты на пастаўку ядзернага паліва з Расеі.

Паводле звестак амерыканскага правасуддзя, з 1996 па 2013 Дарэн Кондры і Кэрал Кондры заплацілі хабараў на суму каля $ $1,692 млн. за атрыманне кантрактаў на суму больш як $33 млн.

Максімальнае пакаранне, якое пагражае Мікерыну, складае 20 гадоў пазбаўлення волі. Кампанію TENAM ён узначальваў з 2010 года, да гэтага больш за 20 гадоў працаваў у «Техснабэкспорт», піша РБК.

ААТ «Техснабэкспорт» уваходзіць у структуру дзяржкарпарацыі «Расатам» і з'яўляецца экспарцёрам прадукцыі пачатковай стадыі ядзернага паліўнага цыкла. Кампанія экспартуе паслугі канверсіі і ўзбагачэнні ўрану і сам узбагачаны ўранавы прадукт 34 энергетычным кампаніям у 16 краінах свету. На сусветным рынку працуе пад брэндам Tenex.

Афіцыйны прадстаўнік «Расатама», як паведамляе РІА «Навіны», не выключыў палітычнага характару пераследу Мікерына, а таксама адзначыў, што амерыканскі бок «спрабаваў схіліць Мікерына да супрацоўніцтва супраць Расеі ў абмен на свабоду».