Жонка Эдуарда, які парэзаў яе і дзяцей: Не разумею, што з ім адбылося
31- 11.11.2014, 10:59
- 54,280
Вольга Ш., якая стала ахвярай жудаснай трагедыі ў Менску, распавядае пра тое, ці мог яе муж ужываць псіхатропы і ўваходзіць у секту.
«Я ў шпіталі, сама дзяцей не бачыла. Ведаю, што яны таксама ў бальніцы. Але як мне распавядае бабуля, ужо ўсе ў прынцыпе нармальна», - кажа «Еврорадио» Вольга Ш., жонка таго самага Эдуарда, які парэзаў нажом яе і дзяцей, а потым выехаў на вуліцу Гая ў Менску і ўчыніў аварыю, падчас якой загінулі людзі.
- Ёсць здагадкі, што ваш муж мог ужываць псіхатропы. Ці праўда гэта?
«Я, калі шчыра, не ведаю. Ніколі нічога падобнага не здаралася. А што дакладна адбылося, я не разумею. Спачатку ўсё здарылася ў доме, а што было далей - я не бачыла. Мне пра гэта ўжо распавялі», - Вольга спрабуе быць ветлівай, але відавочна, што жанчыне вельмі цяжка казаць і аналізаваць сітуацыю.
- Ці магло тое, што здарылася, быць звязана з сектай, якую Эдуард нібыта наведваў?
- Вельмі шмат пытанняў. Але такога я не назірала, мне ён нічога не казаў. Я пра гэта не ведаю.
Нагадаем, што ў суботу, 8 лістапада, мужчына парэзаў нажом жонку і маленькіх сына і дачку. А потым выйшаў у майцы і трусах ў двор, сеў у «Аўдзі» бізнэс-класа і на шалёнай для горада хуткасці пратараніў старэнькую «Аўдзі-100», у якой загінулі пажылая пара і сабака. У выніку гэтага сутыкнення было разбіта яшчэ некалькі машын.
Сам падазраваны Эдуард Ш. цэлым выйшаў з машыны і пайшоў далей па вуліцы Гая. Неўзабаве яго затрымалі. Следчы камітэт пачаў крымінальную справу паводле артыкулаў «Замах на забойства» і «Парушэнне ПДР, што пацягнула праз неасцярожнасць смерць двух асоб».
Пакуль вядзецца следства, грамадства вылучае свае версіі адносна прычын трагедыі. Хтосьці ківае на магчымае псіхічнае парушэнне, хтосьці - на ўжыванне дызайнерскіх наркотыкаў, хтосьці - на міфічную секту, якую апошнім часам нібыта наведваў падазраваны. Але, як папярэдне мяркуюць следчыя, відавочных матываў увязвацца ў такія злачынствы ў Эдуарда Ш. не было. Алкаголю і наркотыкаў у яго крыві не выявілі, хоць тэарэтычна вызначыць некаторыя спайсы і міксы новага пакалення нельга ўжо праз кароткі час пасля прыёму. Як бы там ні было, следства прызначыла падазраванаму комплексную псіхолага-псіхіятрычную экспертызу.
У гэтай трагедыі не можа не абураць адзін нюанс. Чаму міліцыя своечасова не спыніла Эдуарда Ш.? Тым больш, што ў чацвер 6 лістапада, мужчына навёў шоргату ў дзіцячым садзе па вуліцы Карастаянавай, які наведвае ягоны сын. Ходзяць чуткі, што Эдуард нечакана прадэманстраваў дзецям і бацькам нож.
«Ніхто нажом ня размахваў», - адбіваецца ад журналістаў загадчыца садам Ала Прахарчык.
- Гэта значыць гэтага не было?
- Не было, нажом не размахваў.
- А міліцыю выклікалі ў садок?
- Міліцыю выклікалі, так. Усё, нічога больш казаць не буду.
Вядома, што праваахоўнікі наведваліся і на 5-й Смаргоўскі завулак, дзе Эдуард разам з жонкай і двума дзецьмі здымалі частку дома. Але даволі далікатныя з выгляду драўляныя вароты сталі для людзей у пагонах праблемай.
«Калі б яны хацелі ўвайсці, то ўвайшлі б. Значыць, так хацелі увайсці», - апісвае паводзіны міліцыянтаў яшчэ адна жыхарка дома.
- А ў чым справа? Іх не пусцілі, ці што?
«Яны вось так пастаялі ля плота, як вы, і сышлі. Таму ўсе пытанні да іх», - крытыкуе людзей у пагонах жанчына.
Магчыма, калі б міліцыя своечасова адрэагавала на сігнал з дзіцячага саду, то не было б двух трупаў, разбітых машын і парэзаных дзяцей, якіх ледзь выратавалі. Але размова ішла пра дырэктара кампаніі, а не аб якім-небудзь апазіцыянеры, які дзесьці памахаў сцягам. У адваротным выпадку ў катэдж, зразумела, зайшлі б.
Таму цікавімся ў ГУУС Менгарвыканкама, ці праводзіцца нейкія дзеянні з нагоды магчымай халатнасці міліцыянтаў з Цэнтральнага РУУС Менска.
«У сапраўдны момант усе каментарыі магчымыя толькі ад Следчага камітэта. Пракаментаваць штосьці я пакуль што не маю права», - так адказвае на пытанне начальнік прэс-службы ГУУС Менгарвыканкама Аляксандр Ластоўскі.
У цэнтральным апараце Следчага камітэта Беларусі тлумачаць, што вінаваціць міліцыю ў некампетэнтнасці рана.
«Трэба разабрацца ва ўсім, што адбывалася, усе праверыць. Безумоўна, будзе ўлічвацца і тое, ці можна было пазбегнуць трагедыі, - кажа начальнік аддзела інфармацыі і грамадскіх сувязяў Сяргей Кабаковіч. - Рана казаць, ці былі парушэнні з боку міліцыянтаў. Трэба даць следчым папрацаваць. Уяўляеце, колькі людзей пацярпела і колькі машын пашкоджана! Неабходна сфармаваць усе рэчавыя доказы, расставіць усе кропкі, правесці экспертызы...»