Пуцін і Абама коратка абмеркавалі вайну ва Украіне

Прэзідэнты Расеі і ЗША правялі некалькі кароткіх сустрэч у кулуарах саміту АТЭС.

Прэзідэнты Расеі і ЗША Уладзімір Пуцін і Барак Абама правялі ў аўторак у кулуарах саміту Азіяцка-Ціхаакіянскага эканамічнага супрацоўніцтва (АТЭС) «больш, чым дзве сустрэчы», распавёў журналістам Дзмітрый Пяскоў, паведамляе РБК.

Колькі менавіта сустрэч было ў абодвух лідэраў, Пяскоў не ўдакладніў. З ягоных слоў, прэзідэнты казалі коратка, але паспелі абмеркаваць сітуацыю на Украіне і ў Сірыі.

Таксама ў кулуарах форуму Уладзімір Пуцін паспеў правесці сустрэчы з кіраўніком В'етнама і прэм'ер-міністрам Аўстраліі Тоні Эбат.

На парадку дня перамоваў з аўстралійскім прэм'ерам была катастрофа ў небе над Украінай. Абодва лідэра выказаліся за паскарэнне расследавання, сказаў Пяскоў. З ягоных слоў, Пуцін адзначыў, што расследаванне ўскладняюць украінскія вайскоўцы, якія адкрываюць агонь у зоне правядзення расследавання.

Раней Пяскоў толькі пацвярджаў, што прэзідэнты ЗША і Расеі сустракаліся як да, так і пасля паседжання саміту АТЭС.

Намеснік дарадцы нацыянальнай бяспекі Бэн Родс распавёў журналістам, што любая сустрэча з Пуціным разглядаецца як шанец для Абамы, каб нагадаць расейскаму лідэру пра ягонае абяцанне дапамагчы мірнага развязання крызісу ва Украіне, паведамляе Reuters.

Пасля адкрыцця саміту на сустрэчу ў канферэнц-зале кітайскі лідэр Сі Цзіньпін увайшоў у суправаджэнні Абамы і Пуціна, якія стаялі па абодва бакі ад яго. Журналісты Reuters адзначылі напружанне, якое ўзнікла паміж лідэрамі. Калі Уладзімір Пуцін пахваліў унутранае аздабленне залы і сказаў па-ангельску «Тут прыгожа, ці не так?» прэзідэнт ЗША толькі холадна адказаў «Так». Пра гэта распавялі журналісты, што былі сведкамі сцэны.

Пазней, калі ўсе трое падышлі да крэсла кітайскага лідэра, Уладзімір Пуцін паляпаў Абаму па плячы. Аднак гэты жэст застаўся без адказу, адзначае агенцтва.

Як ужо пісаў РБК, у першы дзень працы саміту прэзідэнты выкарысталі магчымасць пагаварыць. Пуцін і Абама пагутарылі цягам 7-8 хвілін у фармаце «на нагах», пасля чаго яны адправіліся фатаграфавацца.

Пазней Крэмль і Белы дом паведамілі, што ніякай гутаркі паміж двума прэзідэнтамі не было, а размова, магчыма, адбудзецца ў аўторак. Карэспандэнт РБК перадаў тады з Пекіна, што, са слоў Дзмітрыя Пяскова, «прэзідэнты павіталі адзін аднаго - быў кароткі кантакт на палях мерапрыемства».

У першай палове другога дня працы саміту Пуцін і Абама правялі яшчэ дзве кароткія сустрэчы ў кулуарах. Перад пачаткам пасяджэння прэзідэнты правялі нядоўгі абмен рэплікамі, а пасля пасяджэння адбылася больш працяглая гутарка ў звыклым ужо фармаце «на нагах».

Раней у Крамлі паведамілі, што не рыхтуюць поўнафарматнай сустрэчу Абамы і Пуціна на саміце АТЭС ў Пекіне і на сустрэчы G20 у Аўстраліі. «З Абамам сустрэча магчымая. Поўнафарматная сустрэча не рыхтуецца, але мы не выключаем, што так ці інакш яны пагутараць», - патлумачыў тады Пяскоў.

Чакаецца, што больш актыўныя дыскусіі, у тым ліку па ўкраінскім пытанні, пройдуць у канцы тыдня ў аўстралійскім Брысбене, дзе пройдзе саміт G20. Там у Пуціна запланаваныя перамовы з прэзідэнтам Францыі Франсуа Аландам і прэм'ер-міністрам Вялікабрытаніі Дэвідам Кэмеранам. Не выключаная таксама яшчэ адна сустрэча з Баракам Абамам.

Апошнія афіцыйныя двухбаковыя перамовы прэзідэнтаў Расеі і ЗША прайшлі летам 2013 года падчас саміту G8 у Паўночнай Ірландыі, затым была кароткая сустрэча падчас саміту G20 у Пецярбургу, аднак без паўнавартасных двухбаковых перамоваў.

Адзіная да саміту ў Пекіне сустрэча прэзідэнтаў пасля далучэння Крыма да Расеі прайшла ў Нармандыі, дзе адзначалася 70-годдзе высадкі саюзнікаў. Аднак тады размова атрымалася кароткай, яна доўжыўся блізу 15 хвілін.