Галоўны прыз «Лiстападзiк» атрымаў фільм пра тое, як дзеці захапілі ўладу

Лёс галоўнага прыза згодна з традыцыяй вызначылі гледачы.

11 лістапада ў сталічным кінатэатры «Піянер» падвялі вынікі «Лістападзіка» - конкурсу фільмаў для дзіцячай і юнацкай аўдыторыі, піша open.by.

Поўная зала маленькіх гледачоў сабралася паглядзець, каму ж дастанецца галоўная ўзнагарода фестывалю. Усяго прэтэндэнтаў на званне лепшых карцін для дзяцей было восем. Свае працы на конкурс падалі рэжысёры з ЗША, Польшчы, Ірана, Аргенціны, Францыі, Італіі, Даніі, Нямеччыны і Кітая.

Міжнароднае журы конкурсу прадстаўлялі ізраільскі рэжысёр Яўген Руман, які атрымаў на леташнім фестывалі спецыяльны дыплом журы «За рэжысёрскую працу», эстонскі мультыплікатар, рэжысёр анімацыйнага кіно, ветэран кінастудыі «Талінфільм» Яана Пылдма і заслужаная акторка Беларусі акторка тэатра і кіно Вера Кавалерава.

Прыз за лепшы фільм для дзяцей аднагалоснай пастановай журы быў прысуджаны іранскаму фільму «Жамчужына» (рэжысёр - Сірус Хасантур). Узнагароду выйшаў атрымліваць Сеед Джавад Джалолі, кіраўнік культурнага прадстаўніцтва пасольства Ісламскай рэспублікі Іран у Беларусі. Ён распавёў гледачам, што ў Іране кожны год здымаецца не менш за дзесяць карцін пра дзяцей і ёсць нават фільмы, якім прысуджалася прэмія «Оскар».

Лепшым фільмам для юнацтва стала сумесная праца аргентынскіх і французскіх кінематаграфістаў «Прыродазнаўчыя навукі» (рэжысёр - Маціяс Лукезі).

Узнагароду за лепшую дзіцячую ролю атрымала Маліка Сіа Граф, стужка «Місія «Еўравізія» (Данія), рэжысёр - Марцін Міэ-Рэнар. Прыз за лепшую работу дарослага актора ў дзіцячым фільме прысуджаны кітайскаму актору Лі Бао Цянь за ролю дзядулі ў фільме «Салавей» (Кітай - Францыя), рэжысёр - Філіп Мюйль. Прыз за лепшую рэжысёрскую працу сёлета дастаўся Марціну Міэ-Рэнар (Данія) за фільм «Місія «Еўравізія»).

Па шматгадовай традыцыі лёс самага галоўнага прыза «Золата Лістападзіка-2014» вырашылі маленькія гледачы. Прыз глядацкіх сімпатый атрымаў нямецкі фільм «З ног на галаву» (рэжысёр - Файт Хельмер), які распавядае аб чатырохгадовых дзецях, якія, усыпіўшы дарослых, пачынаюць кіраваць цэлым горадам.

Пры падвядзенні вынікаў члены журы адзначылі, што амаль усе конкурсныя фільмы гэтага года, несумненна, будуць цікавыя не толькі дзецям, але і дарослым. Вера Кавалерава параіла прыходзіць на сеансы ўсёй сям'ёй, тым больш што паказы фэстывальных фільмаў яшчэ будуць ісці ў кінатэатры «Піянер» да канца тыдня.