Паводле справы аб штурме тэлецэнтра ў Вільні адшукваюцца беларусы

Расследаванне ў справе аб штурме тэлецэнтра ў Вільні завершанае, падазраюць амаль 70 грамадзян РФ, Украіны і Беларусі.

Завершанае дасудовае расследаванне паводле справы аб штурме 13 студзеня 1991 тэлевежы ў Вільні і будынка тэлевізійнага камітэта, паведаміла ў чацвер Генеральная пракуратура Літвы, піша «Інтэрфакс».

Адзначаецца, што паводле справы праходзяць 69 чалавек - грамадзяне Расеі, Украіны і Беларусі, большасць з якіх хаваюцца ад крымінальнага пераследу за мяжой, таму на іх затрыманне выдадзеныя Еўрапейскія ордэры на арышт, яны абвешчаныя ў міжнародны вышук.

Прэс-сакратарка пракуратуры Алена Мартынонене паведаміла агенцтву BNS, што адзін з падазраваных - грамадзянін Расеі, былы савецкі афіцэр Юры Мель, які быў затрыманы сёлета ў сакавіку ў Літве, на мяжы з Калінінградскай вобласцю. Меля вінавацяць у злачынствах супраць чалавечнасці і вайсковых злачынствах. Паводле звестак пракурораў, расейскі грамадзянін быў у адным з танкаў падчас штурму Віленскай тэлевежы. Ён знаходзіцца пад арыштам.

Як гаворыцца ў паведамленні пракуратуры Літвы, пастанова завяршыць расследаванне была прынятая пасля таго, як пракуроры пераканаліся ў тым, што падчас расследавання сабрана дастаткова звестак, што абгрунтоўваюць віну падазраваных ва ўчыненні ваенных злачынстваў і злачынстваў супраць чалавечнасці.

Удзельнікі працэсу - падазраваныя, іх падабаронныя, пацярпелыя, грамадзянскія пазоўнікі або іх прадстаўнікі - могуць азнаёміцца з матэрыяламі расследавання да 12 траўня 2015 года. Потым справа з абвінаваўчым актам будзе перададзеная ў суд.

Пры спробе штурму савецкімі вайскоўцамі ў ноч на 13 студзень 1991 г. тэлевежы ў Вільні і будынка тэлевізійнага камітэта загінулі 14 чалавек, сотні атрымалі раненні.

Пракуратура адзначае, што істотны штуршок у разглядзе справы надалі папраўкі закона, якія ўвайшлі ў дзеянне ў 2000-2001 гадах, палегчыўшы прымяненне крымінальнай адказнасці за злачынствы супраць чалавечнасці і ваенныя злачынствы, якія прадугледзелі магчымасць завяршыць дасудовае расследаванне без удзелу падазраванага ў працэсе.

Злачынствы супраць чалавечнасці і ваенныя злачынствы не маюць тэрміну даўнасці.

Еўрапейскі ордэр на арышт (EAW) дзейнічае на тэрыторыі ўсіх дзяржаў-сябраў ЕЗ. Заканадаўства аб Еўрапейскім ордэры на арышт прадугледжвае экстрадыцыю цягам 90 дзён з дня арышту або цягам 10 дзён, калі затрыманая асоба дае згоду на экстрадыцыю.