Віцябляне патрабуюць павысіць якасць медыцыны

Актывісты кампаніі «За якасную медыцыну ў Віцебску» 12 лістапада падалі ў гарвыканкам і адміністрацыі раёнаў горада заяўкі на правядзенне пікетаў.

Яны плануюць збіраць подпісы пад калектыўным зваротам па праблемах якасці медыцынскага абслугоўвання жыхароў Віцебска.

Як паведамілі charter97.org у прэс-службе БХД, таксама актывісты запісаліся на прыём да старшыні гарадскога савета дэпутатаў Міхаіла Портнага, які адбудзецца 9 снежня.

Аднак запісацца на прыём да старшыні гарвыканкама ім не ўдалося. Загадчык аддзела зваротаў грамадзян Уладзімір Вараб'ёў прыняў актывістаў і параіў ім спачатку звярнуцца ў гарвыканкам па ўсіх пытаннях, якія іх цікавяць, атрымаць адказ, а ўжо затым запісацца на прыём.

«Ну што ж, пытанні адправім, пачакаем адказаў, не прывыкаць. Мы хоць бы нагадалі Вараб'ёву, што звяртаемся да слуг народа, якія павінны сумленна выконваць свае абавязкі», - адзначыла віцебская каардынатарка БХД Таццяна Севярынец.