Зонд Philae даслаў першыя фота з каметы

Зонд, які паспяхова здзейсніў пасадку на камеце Чурумава-Герасіменкі, перадае на Зямлю здымкі нябеснага цела.

Радасць даследчыкаў ад поспеху аперацыі азмрочыла пазаштатная сітуацыя, зафіксаваная праз некаторы час. Як паведамлялася ў Twitter Еўрапейскага касмічнага агенцтва, «аналіз тэлеметрычных звестак з зонда паказвае, што гарпуны не спрацоўвалі, як думалі першапачаткова». Навукоўцы запэўнілі, што апарат знаходзіцца на паверхні ў «выдатнай форме», а каманда спрабуе перазапусціць гарпуны, паведамляе BBC. «Падобна на тое, Philae вельмі далікатна прызямліўся на паверхню каметы, разлічваючы на амартызацыю шасі», - дадалі ў касмічным цэнтры.

Раней у спецыялістаў ЕКА з'явіліся асцярогі аб тым, што ў зонда могуць узнікнуць цяжкасці пры пасадцы. Падчас праверкі пасадачнага модуля было выяўлена, што адна з сістэм спуску, якая забяспечвае цягу для таго, каб пазбегнуць адскоку ў момант прызямлення, не можа быць актываваная.

У сваім афіцыйным Twitter зонд выхваляецца фатаграфіяй свайго новага дома.

Супрацоўнікі Нямецкага аэракасмічнага цэнтра казалі, што прыйдзецца «цалкам спадзявацца на гарпуны пры прызямленні».

Навукоўцы на прэс-канферэнцыі распавялі, што пасля пасадкі зонд адарваўся ад паверхні, трохі пахістаўся, пасля чаго зноў сеў. Такім чынам, атрымліваецца, што за кароткі прамежак часу апарат двойчы прызямліўся на камету. На думку інжынераў, пасля першага сутыкнення зонд мог падскочыць на некалькі сотняў метраў. Цяпер навукоўцы усталёўваюць ягонае дакладнае месцазнаходжанне на паверхні каметы.

Нагадаем, зонд Philae быў запушчаны да каметы з апарата Rosetta. Ён правядзе серыю эксперыментаў з мэтай вызначыць хімічны склад каметы. Акрамя таго, ён павінен атрымаць выявы яе ядра і вывучыць змены яе актыўнасці.

Апарат Rosetta стартаваў з Зямлі 10 гадоў таму і дасягнуў сваёй мэты сёлета ў жніўні. За гэтыя гады Rosetta прайшла шлях у 6 400 000 000 кіламетраў па складанай траекторыі, гэта ў пяць разоў больш за адлегласць ад Зямлі да Сонца. За 10 гадоў апарат некалькі разоў мяняў кірунак палёту, каб выйсці на мэту, адзін раз зблізіўся з Марсам і тройчы - з Зямлёй. Rosetta таксама паспяхова пераадолела пояс астэроідаў, адначасна даследаваўшы два астэроіда - 2867 Штэйнс і 21 Люцэц. Яе сустрэчу з каметай ўжо паспелі ўнесці ў 10 самых гучных і чаканых прарываў 2014 года ў сусветнай навуцы.