Мясніковіч: Ва ўсім вінаватая дэвальвацыя расейскага рубля

Прэм'ер-міністр Беларусі ўважае долю імпарту харчавання высокай.

Пра гэта кіраўнік урада паведаміў сёння журналістам падчас наведвання спецыялізаванай міжнароднай выставы-кірмашу «Прадэкспа-2014», паведамляе БелТА.

«На ўнутраным рынку прысутнічае яшчэ дастаткова шмат тавараў, аналагі якіх вырабляюць нашы прадпрыемствы», - адзначыў Міхаіл Мясніковіч, азнаёміўшыся з экспазіцыяй. Прэм'ер-міністр канстатаваў, што асартымент айчынных вытворцаў прыкметна пашыраецца і паляпшаецца якасць прадукцыі. «Таму ёсць усе падставы сцвярджаць, што імпартныя складнікі будуць змяншацца не ў шкоду якасці. Вядома, чалавек галасуе сваім кашальком, таму яму павінна быць дадзеная магчымасць выбару. Тыя ж макароны, да прыкладу, павінны быць і беларускія, і італійскія», - адзначыў прэм'ер. Гэта, падкрэсліў ён, прымушае нацыянальных таваравытворцаў рабіць больш якасную прадукцыю і працаваць з коштам.

Разам з тым кіраўнік урада згодны з тым, што ёсць аб'ектыўныя цяжкасці, што адбіваюцца на канкурэнтаздольнасці айчынных тавараў. У першую чаргу гэта высокія адсоткі стаўкі крэдытаў - звыш 30% гадавых. У выніку не толькі пагаршаецца эканоміка прадпрыемстваў, але і пакутуе імпартазамяшчэнне, так як на рынак паступае прадукцыя з іншых краін.

«Акрамя таго, мы знаходзімся ў Мытным саюзе, а цяпер яшчэ і ў Еўразійскім эканамічным саюзе, і дэвальвацыя расейскага рубля негатыўна адбілася на дзейнасці нашых экспарцёраў», - дадаў Міхаіл Мясніковіч. У сувязі з гэтым урад сумесна з Нацыянальным банкам Беларусі разглядае магчымасць мінімізацыі страт прадпрыемстваў ад курсавых розніц.

Агулам жа, са слоў Міхаіла Мясніковіча, харчовая прамысловасць у Беларусі ўсё ж развіваецца даволі дынамічна, ствараючы сур'ёзную канкурэнцыю замежным аналагам. «Гэта, безумоўна, радуе, аднак ёсць яшчэ над чым працаваць, каб павялічыць долю прысутнасці айчынных тавараў на беларускім рынку і нарасціць аб'ёмы экспарту, - адзначыў прэм'ер-міністр. - Для гэтага трэба, вядома, каб урад і Нацыянальны банк стваралі адпаведныя эканамічныя ўмовы , якія будуць спрыяць больш агрэсіўнай і рэнтабельнай працы прадпрыемстваў як на ўнутраным, так і на экспартным рынках».