Два браты распачалі стрэляніну на вуліцы Менска
17- 13.11.2014, 15:03
- 31,604
Ёсць пацярпелыя.
Два раней судзімыя браты распачалі стрэляніну з пнеўматыкі. Пра гэта сайту charter97.org паведамілі ў ГУУС Менгарвыканкама.
Паводле інфармацыі праваахоўнікаў, блізу гадзіны ночы ў будаўнічым гарадку на вуліцы Налібоцкай двое невядомых кінулі петарду ў «вартоўню». Вартаўнік выйшаў і зрабіў ім заўвагу.
У адказ на гэта маладыя людзі пачалі лаяцца і страляць у вартаўніка. Яны зрабілі чатыры стрэлы з пнеўматычнага пісталета. Пацярпеламу давялося аказаць сабе першую медыцынскую дапамогу.
На гукі страляніны падышлі двое будаўнікоў, яны паспрабавалі заступіцца за вартаўніка. Але хуліганы пачалі страляць і ў іх, а потым яшчэ ўжылі і электрашокер.
Аператыўнікі Фрунзенскага РУУС прыклалі нямала намаганняў, каб знайсці парушальнікаў. За некалькіх дзён яны сабралі сведкавую базу, апыталі жыхароў бліжэйшых дамоў і работнікаў прылеглых арганізацый. Высветлілася, што маладыя людзі хадзілі па вуліцах мікрараёна і кідалі петарды.
Міліцыі ўдалося ўстанавіць асобы падазраваных і іх месцазнаходжанне. Пры іх затрыманні работнікі праваахоўных органаў знайшлі электрашокер і два пнеўматычных пісталета. Двух братоў 23 і 25 гадоў даставілі ў раённае УУС для разбору. Высветлілася, што абодва сваякі раней ужо былі судзімыя.
Цяпер яны арыштаваныя і знаходзяцца ў следчым ізалятары. Затрыманым пагражае да 10 гадоў пазбаўлення волі.