Алег Ляшко: Калі Украіна купіць вугаль у РФ, мы не ўвойдзем у кааліцыю
15- 14.11.2014, 9:05
- 15,889
Радыкальная партыя адмовіцца ўвайсці ў кааліцыю, калі Украіна закупіць вугаль у Расеі.
Пра гэта паведаміў яе лідэр Алег Ляшко на сваёй старонцы ў сацыяльнай сетцы «Фэйсбук» у чацвер, 13 лістапада.
«Украіна закупіць у Расеі 510 тысячаў тон вугалю. Няўжо ў цяперашнім урадзе ўсе безгаловыя?! Як закупляць вугаль або што-небудзь іншае ў агрэсара, які забівае тваіх грамадзян? У каго заўгодна, любым коштам, толькі не у акупантаў!! Парашэнка і Яцанюк, спыніце гэта злачынства! Інакш Радыкальная партыя адмовіцца увайсці ў кааліцыю», - напісаў палітык.
Нагадаем, у верасні ўрад Украіны заключыла дамову з ПАР на пастаўку блізу мільёна тон вугалю. У пачатку лістапада першую партыю паўднёваафрыканскага вугалю атрымала Зміеўская ТЭС, у прыватнасці, на цеплаэлектрастанцыю прыбыло блізу 3,5 тысяч тон вугалю з ПАР.
У сваю чаргу прэзідэнт краіны паставіў пад сумнеў празрыстасць схемы паставак вугалю з ПАР ва Украіну. Пасля гэтага кіраўнік Мінэнерга Юрый Продан быў выкліканы на допыт у Генпракуратуру ў пытанні вугальных закупак.
Учора ўвечары стала вядома, што дзяржаўная энэргагенерыруючая кампанія «Цэнтрэнэрга» купіць 509.000 тон расейскага вугалю па 80 даляраў за тону.